ХАНХҮҮ ХАРРИ АНХ УДААГАА НАЙЗ БҮСГҮЙНХЭЭ ХАМТ ЁСЛОЛД ОРОЛЦЖЭЭ

Их Британийн ханхүү Харри анх удаагаа найз бүсгүй Меган Марклынхаа хамт ёслолд оролцжээ. Канадын Торонто хотын Air Canada Centre-д болсон хөгжлийн бэрхшээлтэй дайчдын тэмцээн Invictus Games-ийг нээж ханхүү Харри үг хэлсэн байна. Тус тэмцээнийг 2014 онд ханхүү Харри санаачлан зохион байгуулж, улмаар Их Британийн Хатан хааны болон АНУ-ын төр засгийн дэмжлэгийг хүлээсэн юм.

Харин энэ ёслолд ханхүү Харри АНУ-ын тэргүүн хатагтай Мелани Трамптай мөр зэрэгцэн сууж, найз бүсгүй Меган Маркл нь бага зэрэг зайтай суужээ. Учир нь Их Британийн Хатан хааны гэр бүлийн уламжлалт ёсны дагуу албан ёсоор эхнэр нөхөр болоогүй бол ханхүү олны өмнө найз бүсгүйтэйгээ хамт суухыг хориглодог байна.

Тиймээс Меган Марклын дэргэд түүнийг жилийн өмнө ханхүүтэй танилцуулсан Маркус Андерсон суусан аж. Ханхүү Харриг үг хэлж дуусмагц бүсгүй ёслолыг орхин гарсан гэнэ.

М.Болджин