Түрэг хэлт улсуудын зөвлөл гэдэг олон улсын байгууллага нь түрэг хэлтнүүдэд зориулсан тусгай ТВ суваг байгуулахаар болсоноо Стамбул хотноо зарлажээ. Энэхүү зөвлөлийг 2009 оны гуравдугаар сард Турк, Азербайжан, Казахстан, Кыргызстан улсууд түрэг хэлтнүүдийн хооронд гадаад улс төрийн бодлого, эдийн засаг, тээвэр, гаалийн татвар, аялал жуулчлал, боловсрол, спорт зэрэг салбарууд дахь хамтын ажиллагааг өргөжүүлэн хөгжүүлэх зорилгоор байгуулж байжээ. Хожим энэ зөвлөлд Узбекистан нэгдэж, Унгар улс ажиглагчийн статустай оролцох болсоноор хүрээгээ тэлсэн.
Түрэг хэлт улсуудын зөвлөл нь Евразийн бүс нутаг, лалын шашинт ертөнц, түүний дотор Төв Ази ба Кавказ дахь олон улсын хамтын ажиллагааг хөгжүүлэхэд хамгийн ихээр анхаарч буй тул ийнхүү тусгай ТВ суваг нээж байгаа тухай тус зөвлөлийн Ерөнхий нарийн бичгийн дарга Багдад Амреев онцолсон байна.
Түрэг хэлтэн үндэстнүүдийн дийлэнх нь Азербайжаны азербайжанчууд, Туркменистаны туркменүүд, Казахстаны казахууд, Кыргызстаны киргизүүд, Узбекистаны узбекууд, ОХУ-ын кумыкууд, балкарууд, чувашууд, татарууд, башкирууд, ногайчууд, тува, хакас, уулын алтайчууд ба Днестр орчмын бүгд найрамдах улсын гагаузууд, Туркийн туркууд, БНХАУ-ын уйгарууд юм. Дэлхий дээрх түрэг хэлтнүүдийн тоо 120 саяд хүрээд байгаа. Түрэг хэлт улсуудын зөвлөлийн гишүүн орнууд хоорондын барааны эргэлт 10 тэрбум долларт хүрчээ.
Сэтгэгдэл (0)
Сэтгэгдэл бичигдээгүй байна