С.Зориг агсны амь насыг хөнөөсөн хэргээр ял эдэлж байгаа Т.Чимгээ, Б.Содномдаржаа нарыг шалгахдаа эрүүдэн шүүсэн гэх хэргийн шүүх хурал өнгөрсөн наймдугаар сарын 19-нд шийдвэрээ гаргасан. Шүүгдэгч Б, Хурц нарын есөн хүн 17 өмгөөлөгчийн хамт, хохирогчоор Т.Чимгээ, Б.Содномдаржаа, Б.Булган нар өмгөөлөгчийн хамт, хөндлөнгийн ажиглагчаар нэг иргэн оролцсон. Зургаа хоног үргэлжилсэн шүүх хурлын дүнд шүүх бүрэлдэхүүнээс хэргийг нэмэлт мөрдөн байцаалтад буцаах шийдвэр гаргасан юм.
Тэгвэл шүүхийн тогтоол албажин гарч, өчигдөр Прокурорт хүргүүлсэн байна. Уг тогтоолд ганцхан прокурор л эсэргүүцэл бичих эрхтэй. Тогтоол прокурорт хүргэгдсэнээр эсэргүүцэл бичих тав хоног эхэлж байгаа юм. Хэрэв прокурор эсэргүүцэл бичвэл талууд Төв аймгийн сум дундын давж заалдах шатны шүүхээр маргаж, хэргийг шийдвэрлэнэ. Харин эсэргүүцэл бичээгүй тохиолдолд хэрэг нотлох баримтуудын шүүхийн тогтоолд заасан зөрчлүүдийг арилган, дахин маргах юм.
Шүүх хурлын сүүлийн өдөр хохирогчоор оролцож буй Б.Содномдаржаагийн нэг өмгөөлөгч "гадаад улсад эмчлүүлэхээр явсан" хэмээн шүүх хуралд оролцоогүй нь шүүгдэгч талын нөлөө орсон уу гэх хардлага нийгэмд үүссэн. Харин нөгөө өмгөөлөгч н.Оюунчимэгийн хувьд "Шүүхийн шийдвэртэй санал нийлж байна" хэмээн мэдэгдсэн юм.
Бид энэ асуудлаар Б.Содномдаржаагийн ээжээс тодруулахад "Шүүх хурал болоод нэлээд хугацаа өнгөрсөн ч энэ хэргийг үргэлжлүүлээд шалгах, эсвэл хаах талаар бидэнд ямар ч мэдээлэл алга. Манай өмгөөлөгч гадаадад заавал эмчлүүлэх яаралтай шаардлага байсан эсэхийг ч бид сайн мэдэхгүй байна. Одоо энэ хэрэг хаашаа эргэхийг үлдсэн өмгөөлөгч маань л мэдэх байх" гэсэн. Түүнчлэн Т.Чимгээгийн ах Т.Хүрэлбат ч хэрэг хэрхэн үргэлжлэх талаар ямар нэг мэдээлэлгүй байгагаа хэлэв. Олон нийтийн дунд хүлээлттэй байгаа энэ хэрэг хэрхэн үргэлжлэх нь одоо прокурорын эсэргүүцэл бичих эсэхээс шалтгаална. Тодруулбал энэ сарын 11-ний өдөр уг асуудал тодорхой болох юм.
Сэтгэгдэл (0)
Сэтгэгдэл бичигдээгүй байна