УИХ дахь Шинэн-ын зөвлөл өчигдөр хуралдаж, Монгол улсын өрийн асуудал, Гэр бүлийн орчин дахь хүчирхийлэл, Хүүхэд хамгааллын асуудлыг хэлэлцлээ. Хуралдаанд тус намын гишүүд, Хөдөлмөр, нийгмийн хамгааллын яам, Гэр бүл, хүүхэд, залуучуудын хөгжлийн газар болон Хүчирхийллийн эсрэг үндэсний төв зэрэг байгууллагын төлөөлөл оролцов. Хүүхдийн хүчирхийллийн асуудалд тус намын зүгээс онцгой анхаарал хандуулна гэдгээ мэдэгдсэн. Энэ талаар Шинэн-ын зөвлөлийн дарга Л.Болд "Бид гэр бүл төвтэй нам учраас гэр бүлийн хүчирхийлэл, Хүүхдийн эрхийн асуудалд онцгой анхаарал хандуулан ажиллаж, Холбогдох хуулийн талаар нээлттэй сонсгол тогтмол явуулах төлөвлөгөөтэй байна. Энэ онд гэр бүлийн хүчирхийлэл өмнөх онтой харьцуулахад 34.4 хувиар өсжээ. Жилд 20 мянга орчим мянган хүн гэр бүлээ батлуулдаг гэх судалгаа бий. Үүнээс 4000-5000 нь гэр бүлээ цуцлуулдаг байна. 400, 500- гаар яригддаг байсан гэр бүл салалт сүүлийн жилүүдэд 10 дахин нэмэгдсэн. Энэ нь монголын нийгмийн үндэс суурь ганхахад нөлөөлж байна. Иймд Шинэн-ын зүгээс дээрх асуудалд анхаарал хандуулж, монгол төрийн бодлогыг гэр бүлд суурилсан төрийн бодлого болгож өөрчлөх, хүүхэд хамгааллын асуудлыг онцгойлон авч үзэх, татвар урамшууллын зэрэг бүхий л бодлогоор залуу гэр бүлийг дэмжих талд олон хууль тогтоомж боловсруулж, анхаарч ажиллах болно" гэв. Мөн энэ үеэр тус намын Ерөнхий зөвлөлийн гишүүн, эдийн засагч Х.Батсуурь "монгол улсын өр онцгой анхаарах асуудал болоод удаж байна. Засгийн газрын өр 2019 оны III улирлын байдлаар нэрлэсэн үнээрээ 24.7 их наяд төгрөг байна. Өнөөгийн үнэ цэнээр тооцох юм бол 20.7 их наяд төгрөгийн өр болно. Гэхдээ өнөөгийн үнэ цэнээр тооцохдоо олон улсад баримталдаг тодорхой зарчмуудыг зөрчсөн байгаа. Энэ нь өрийн хэмжээ хэвийн байгаа мэт харагдуулж байна. 2020 оны төсөвт зөвхөн өрийн хүүгийн зардалд 960 тэрбум төгрөг тусгасан. Гэтэл 2020 онд томоохон зардал буюу зээлийн үндсэн төлбөрүүд хийгдэнэ. Тодруулбал, Монгол банкнаас БНХАУ- ын ардын банктай хийсэн свон хэлцэлээр авсан 15 тэрбум юань буюу 2.2 тэрбум ам.долларын өрийг төлөх ёстой. Үүнийг бид төвбанкны өр гэж хараад байна. Бодит байдал дээрээ төрийн хариуцах ёстой өр. Тэгэхээр 2020 онд нийт 2.7 тэрбум ам.долларын төлөлт хийх нөхцөл үүсчихээд байхад үүнийг төсөвт огт тусгаагүй, хэрхэн төлөх талаар мэдээлэл алга" гэлээ.
Сэтгэгдэл (0)
Сэтгэгдэл бичигдээгүй байна