Худалч хурандаа Д.Дамдинцэрэн

Өнгөрсөн жил Хуульзүйн дотоод хэргийн сайд Ц.Нямдорж нь 300 орчим сая төгрөгийн ханштай 2018 оны "Lexus-570" маркийн автомашин хөлөглөж олны дургуйцлийг хүргэсэн. Шүүмжлэл ид өрнөж эхлэхэд Ерөнхий сайд У.Хүрэлсүх "тухайн автомашиныг буцааж зарахыг үүрэгдсэн"-ээр асуудал намжсан.

Хачирхалтай нь Ц.Нямдорж сайд тансаглалаасаа татгалзсан ч тухайн автомашиндаа зүүлттэй байсан "0101-УБҮ" дугаарыг "аваад үлдсэн" гэж хэлж болно. Учир нь Ц.Нямдоржийн хүү Н.Баясгалангийн жийп автомашинд өнөө дугаар нь зүүлттэй байгааг бид хүргэсэн билээ. Үүнийг ч АТҮТ-ийн ахлах мэргэжилтэн Ш.Найданхүү батлан, манай сэтгүүлч Ц.Анхзулд ярилцлага өгсөн байдаг.

Гэтэл ШШГЕГ-ын дарга, Хурандаа Д.Дамдинцэрэн хэнэг ч үгүй мэлзэв. Тодруулбал, тэрбээр дөнгөж сая Төрийн ордонд манай сэтгүүлч Н.Өнөрцэцэгийн асуултад хариулахдаа "Мэдэхгүй, ер нь бол 2018 онд болсон асуудал байсан ш дээ. Түүгээр нь лавлаад үзэхэд эргээд ШШГЕГ-ын нэр дээр бүртгэлтэй байгаа, одоо" гэсэн хариултыг өгч байх юм. Хэрэв Д.Дамдинцэрэн даргын хариулт үнэн бол яагаад ШШГЕГ-ын нэр дээр бүртгэлтэй байгаа автомашины улсын дугаарыг хувийн компанийн захирал Н.Баясгалан өөрийнхөө машинд зүүчихээд яваа байгаа юм бэ?

Баримтыг дахин хүргэж байна. 01-01 УБҮ улсын дугаар ШШГЕГ-ын нэр дээр биш Н.Баясгалангийн ззэмшлийн ХХК-ийн нэр дээр байгааг баримт харуулж байна. Жич: Энэ баримт нь 2019.12.03-ны өдрийн АТҮТ-ийн бүртгэлээс олдсон баримт бөгөөд 2019.12.04-ний өдөр АТҮТ-ийн ахлах мэргэжилтэн Ш.Найданхүү ч батлан ярьсан билээ.