ЭМЯ-аас Сovid-19 вирустай холбоотой нөхцөл байдал, авч хэрэгжүүлж байгаа арга хэмжээний талаар мэдээлэл хийж байна

ЭМЯ-аас коронвирусийн тархалтыг зогсоох талаар авч байгаа арга хэмжээний талаар ээлжит мэдээллээ хүргэлээ. Хэвлэлийн хурал дээр ЭМЯ-ны хэлтсийн дарга Д.Нарангэрэл халдвар гарсан улс орнууд руу аялахгүй байхыг ахин уриалав. Ийнхүү удаа дараалан хариуцлагатай байхыг уриалсаар байтал зарим иргэд Covid-19-ийн халдвартай улс орнууд руу аялсаар байгаа төдийгүй бусдад аюул учруулж болох газраар явсан тухай мэдээллээ нууж байгаа талаар ЭМЯ-ны Эмнэлгийн тусламж, үйлчилгээний газрын дарга Я.Буянжаргал мэдээлэл өглөө. Тэрээр:

- Өчигдөр Москва-Улаанбаатар чиглэлийн онгоцноос гэр бүлийн гурван хүн Италиар дайрч ирсэн гэдэг түүхээ биднээс нууж буусан байсан. Иймд хууль хяналтын бүх байгууллагууд хамтарч ажиллаад хоёрдугаар сарын 12-нд Улаанбаатараас гарч яваад Швейцарын Женев орж, тэндээсээ Италийн Милан хотод орсон. Тэндээсээ Женевт буцаж ирээд Франц руу явсан. Эргээд Женевт ирээд Москвагаар дамжин Улаанбаатарт ирэхдээ Италиар дайрсан гэдэг мэдээллээ гурвуул нуусан байсан. Дараа нь бид энэ гурван хүний хаягийг тодруулж очсон. Энэ гурван хүн буугаад шууд ажил дээрээ очсон мэдээ ирсэн. Иймд ажил дээр нь очиж хяналтын камерын бичлэгийг шүүж, хавьтлуудыг тодруулан тандалт судалгаа хийсэн. Энэ бол маш хариуцлагагүй үйлдэл. Дэлхийн 79 оронд халдвар гараад, ДЭМБ-аас ердийн нэг томуу биш, нас баралт 3,4 хувь гэж анхааруулаад, иргэн бүрийн хариуцлага чухал гээд байхад л ийм үйлдэл гаргаж байна гэлээ.

ЦЕГ-ын албаны дарга, хурандаа Ж.Амгалан:

-Өвчнөөс сэргийлэх арга хэмжээг маш сайн авах хэрэгтэй гэдгийг ард иргэд сайн ухамсарлаж, дэмжиж байгаад талархаж байна. Гэвч зарим иргэд хариуцлагагүй байдал гаргаж байна. Тухайлбал, УОК-ийн шийдвэр гаргаад шаардлагатай гэж тусгаарласан иргэд зөрчил гаргаж байна. Хөвсгөл аймгийн харьяат Б гэгч эмэгтэй, өөрөө сувилагч, эрүүл мэндийн ажилтан атлаа бусдыг тусгаарлаж байгаа газрыг орхиж явъя гэж турхирч, жагсаал маягийн юм хийх гэж оролдсон байна. Хоёрдугаар эмнэлэгт байгаа нэг иргэн ачаа тээшиндээ авчирсан согтууруулах ундааг ууж, бусдад уулгах гэж оролдсон, бусад өрөөний хаалгыг татсан үйлдэл гаргасан. Мөн ХӨСҮТ дээр тусгаарласан иргэдийн зарим нь гарна гэж дураараа авирласан үйлдэл гаргасан. Монгол улс нь олон төрлийн эрх чөлөөтэй ч гэлээ хүний амь нас, эрүүл мэндээс илүү эрх чөлөө гэж байхгүй. Иймд өөрийн эрх чөлөө гэж ярихаас өмнө бусдын амь нас, эрүүл мэндийг хүндэтгэж, УОК-оос тавьж байгаа шаардлагыг ёсчлон биелүүлэх нь иргэн үүрэг юм. Энэ үүргээ биелүүлээгүй хэнтэй ч байсан хариуцлага тооцно. Эрүүгийн хуулиар, Зөрчлийн хуулиар заасан арга хэмжээг авна. Өнөөдөр гарсан зөрчил дээр баримт цуглуулж байгаа бөгөөд дараа нь хориг арга хэмжээ дуусахаар хатуу арга хэмжээ тооцно.

Гарсан тохиолдол бүрийг бид баримтжуулж байна. Нэг хүн онгоцноос буугаад Налайх руу зугтсан хэрэг гарсан. Зарим тусгаарлагдахдаа өөр газар тусгаарлагдана гэж гэсэн. Эмч нарын тавьж байгаа шаардлагыг эсэргүүцдэг, дураараа дургиж байгаа хүмүүст тухай бүрд хариуцлага тооцно. Ингэж ухамсаргүй байж болохгүй ээ. Цаашид ч энэ хандлагаа үргэлжлүүлсэн хэвээр байвал хэвлэл мэдээллийн хэрэгсэл ашиглан олон нийтэд үйлдлийг нь зарлана.

Тухайлбал, Итали улсаар дамжиж ирсэн Ш, А гэсэн хоёр хүн байна. Энэ хоёр нь Н гээд хүүхэд дагуулж явсан. Тэгээд явсан газраа тодорхой мэдүүлээгүй, ташаа мэдүүлээд баахан ажил удсан. Энэ мэт бүх үйлдлийн ард тодруулах гэж асар зардал гарч байгааг ойлгох хэрэгтэй. Тодруулах гэж хүмүүс өдөр шөнөгүй ажиллаж байна. Энэ бол нэг ч гэсэн иргэнээ халдвар авхуулахгүй гэсэндээ хийж байгаа зүйл. Бүгд хариуцлагатай ухамсартай байцгаая.