Их Британийн ерөнхий сайд Борис Жонсоны бие муудаж, эрчимт эмчилгээнд орлоо

Их Британийн Ерөнхий сайд Борис Жонсон ковид19 вирусийн халдвар авсан нь тогтоогдож өөрийгөө тусгаарлах болсон тухай арав хоногийн өмнө анх мэдээлж байв. Шинж тэмдэг хөнгөн байгаа тул алсын зайнаас гүйцэтгэх засаглалын ажлаа хэвийн явуулна гэж мэдэгдэж байсан Ерөнхий сайдын халуун бууралгүй амралтын өдрөөр Лондонгийн эмнэлэгт хэвтсэн билээ. Тэгвэл урд шөнө түүнийг эрчимт эмчилгээний тасагт шилжсэн тухай BBC мэдээлж байна.

55 настай Борис Жонсонд амьсгалын аппарат залгасан тухай мөн Британийн хэвлэлүүд бичиж байгаа ч Даунинг Стрийтийн хэвлэлийн төлөөлөгч энэ талаар мэдээлэл хийсэнгүй. Ерөнхий сайдад шаардлагатай эмчилгээг цаг алдалгүй хийж байгаа гэв.