АНУ-д COVID-19-ийн цар тахлын үр дагаврыг даван гарах эдийн засгийг дэмжих тухай хуулийн дагуу иргэддээ 1,2 мянган долларын нэг удаагийн тусламжийн мөнгийг өгч эхэлжээ. АНУ-ын Татварын албанаас энэ тухай Twitter хуудсаараа мэдээлсэн байна.
Ерөнхийлөгч ДональдТрампын гарын үсэг зурж баталгаажуулсан эдийн засгийн тусламжийн тухай хуулийн дагуу нийт 2 их наяд долларын тусламж үзүүлэх юм. Энэ хуулиар цар тахлын үеийн ажилгүйдлийн тэтгэмж, эмнэлгийн байгууллагуудад үзүүлэн тусламж, компани ба салбаруудад үзүүлэх хөнгөлөлт зэргийг багцаар нь шийдсэн юм. Мөн энэ хуулийн дагуу олон сая америк иргэд тус бүр 1,2 мянган долларын нэг удаагийн буцалтгүй тусламжийн авах болсон нь ийнхүү хэрэгжиж эхэлжээ.
АНУ дах COVID-19-ийн нөхцөл байдал маш хүнд хэвээр байна. Дөрөвдүгээр сарын 12-ны өглөөний 9 цагийн байдлаар АНУ-д халдвар авсан 527 мянга 111 хүн бүртгэгдсэн. Энэ өвчний улмаас нас барсан хүний тоо 20,5 мянга болсон. Ингэснээр АНУ нь халдвар авсан хүний тоо ба энэ өвчний улмаас нас барсан тохиолдлын тоогоор нэгдүгээр бичигдэх боллоо.
Түүнчлэн Ерөнхийлөгч Трамп нь Вайоминг мужид өргөн хүрээтэй гамшгийн байдал буюу онц байдал зарласнаар (major disaster) АНУ-ын түүхэнд анх удаа бүх 50 мужид нь онц байдлын дэглэм мөрдөгдөж байгаа тухай Foxnews мэдээлсэн байна. Өргөн хүрээтэй гамшгийн байдал зарласнаар тухайн муж улсын засаг захиргааны албад ба төрийн бус зарим байгууллагууд холбооны засгийн газраас санхүүжилт авах болон. Түүнчлэн цар тахлын эсрэг мужийн түвшинд авч хэрэгжүүлж байгаа арга хэмжээ бүрийг Онц байдлын холбооны агентлаг ба АНУ-ын Армийн инженерийн цэргийн шийдвэр ба үйл ажиллагаатай уялдуулах ёстой болдог аж.