Эдийн засгийн дэмжих оновчтой хөтөлбөр хэрэгжүүлэхийг шаардан Монголын худалдаа аж үйлдвэрийн танхимаас ирэх баасан гарагт буюу тавдугаар сарын 1-ний өдөр тайван жагсаал хийхээ мэдэгдлээ.
Олон улсын хөдөлмөрчдийн эв нэгдлийн өдрийг тохиолдуулан хийх жагсаалаар хорио цээрийн дэглэмийн улмаас дампуурлын ирмэгт тулж ирээд буй хувийн хэвшлийнхэнийг дэмжихийг Засгийн газарт уриалах юм.
Хувийн хэвшлийнхэн нэг сая ажлын байр олгодог бөгөөд хөл хорио тогтоосноос хойш 100 хоног бүсээ чангалж байна. Мөн хорио цээрийн дэглэмийн улмаас дампуурах нь дампуурч, ашиг олох бүү хэл зардлаа ч нөхөж чадахгүй компаниуд олширч буйг онцоллоо. Иймээс тавдугаар сарын 1-нд бүх нийтийн тайван жагсаал хийж, эдийн засгаа эрчимжүүлэх бодлого хэрэгжүүлэх, хувийн хэвшлийн аж ахуйн нэгжүүдийг бодлогоор дэмжихийг Засгийн газраас шаардах юм.
Эргэн сануулахад МҮХАҮТ 1500 гаруй компаниас шинэ коронавирусийн ажлын байранд үзүүлэх нөлөө судалгааг авсан бөгөөд ажлын байранд нөлөөлж байна гэж үзэж буй компаниуд 30 хувьд хүрээд байна.
Шинэ коронавирусийн улмаас эдийн засагт үүсээд буй хүндрэлийн улмаас 260 мянган хүн ажилгүйчүүдийн эгнээнд шилжихэд ойрхон байгаа тул Засгийн газар яаралтай арга хэмжээ авах нь зүйтэй гэв. Мөн аж ахуйн нэгж, байгууллагууд зардлаа танаж эхэлсэн бөгөөд яаралтай зөв арга хэмжээ авахгүй бол эдийн засаг хүндрэх төлөвтэй байгааг судалгаагаар харуулжээ.
Сэтгэгдэл (0)
Сэтгэгдэл бичигдээгүй байна