​ Лукашенко Беларуст хувьсгал гарахгүй гэв

Беларусын Ерөнхийлөгч Александр Лукашенко улсад нь ямар ч хувьсгал гарахгүй гэж мэдэгдсэн байна. Тэрээр улсынхаа хамгийн том компани болох хөдөө аж ахуйн калийн бордооны “Беларускали” компаниар зочлох үеэр “Бидний хилийн чанадаас урдах ёсгүй, бид өөрсдийн толгойгоор амьдрах ёстой гэдэг ганц зүйлийг санаж байх хэрэгтэй. Хэрэв үүнийг дэмжиж байгаа бол бүгд эх орноо, үр хүүхдээ хамгаалцгаая. Хэрэв үгүй бол өөр Ерөнхийлөгч хайцгаа. .. Хувьсгалын лимитийг шавхсан, тэр бүү хэл манайд хувьсгалчид ч байхгүй болсон. Харин “майдан толгойтнууд” бол хангалттай олон бий. Гэхдээ манайд “майдан” хэрэггүй, бид үр дүнд нь улс орон сүйрдэг гэдгийг харцгааж байна” гэж мэдэгджээ.

 Шинэ корона вирусийн тархалтаас үүдсэн хорио цээрийн дэглэм ба эдийн засгийн доройтлын улмаас Ерөнхийлөгч Лукашенкогийн байр суурь ганхаж эхэлсэн тул наймдугаар сарын 9-нд явагдаг Ерөнхийлөгчийн сонгуулиар ард олон шинэ хүн сонгох магадлал өндөр болсон гэж ажиглагчид үзэж байгаа юм. Иймд Лукашенко нь сонгуулиар өрсөлдөхөөр нэрээ дэвшүүлсэн сөрөг хүчний төлөөлөгчдийг баривчилсан байна. Үүнээс болоод сонгуулийн дараа Беларуст “майдан” хувьсгал гарч Украйнтай адил болж магадгүй тухай их яригдах болсон юм.