Энэтхэгийн Засгийн газар царцааны нүүдэлтэй тэмцэхдээ нисдэг тэрэг ашиглахаар болсон тухай “The Indian Express” мэдээлж байна. Тус улсын Уттар-Прадеш муж нь хөрш Пакистанаас орж ирсэн царцааны нүүдэлд дарагдаад байгаа юм. Мужийн эрх баригчид 60 хоногийн турш нисдэг тэргээр шавжийн эсрэг пестицид цацуулахаар гэрээ байгуулсан аж. Нэг нисдэг тэрэг 250 литр пестицид зөөж 50 гектар газар тараан цацах чадвартай байдаг тул ийнхүү хөлсөлж байгаа юм байна. Царцааны их нүүдэл орж ирэхээс өмнө хортон шавжийн эсрэг пестицид цацахдаа бага оврын дронууд ашигладаг байжээ.
Царцааны нүүдэл нь хөрш Пакистанд хэдэн мянган гектар талбайн ургацыг юу ч үгүй устгасан байна. Тус бүс нутагт борооны улирал ердийнхөөс сунжирсантай холбоотойгоор царцаа ийнхүү олон саяар үржин сүрэглэсэн байна. Энэтхэг сүүлийн 30 гаруй жилийн турш ийм өргөн хүрээтэй царцааны нүүдэлд өртөж байгаагүй юм байна.
Царцааны нүүдэл нь Энэтхэгийн хил даван орж ирснээс хойш арваад хоногийн дотор 50 мянган гектар газрын ургацыг устгаж амжжээ. Цаашид яаралтай арга хэмжээ аваагүй тохиолдолд ургац алдаж, олон сая хүн өлсгөлөнд нэрвэгдэх аюултай болсон байна.
Судлаачдын тооцсоноор 40 сая царцаа нь 35 мянган хүнд хүрэлцэх хэмжээний ургацыг идэж устгадаг бол дундаж сүрэгт ойролцоогоор 500 сая царцаа нисэж, нэг дор 1 хавтгай дөрвөлжин км талбайг бүрхдэг аж.
25°C
Сэтгэгдэл (0)
Сэтгэгдэл бичигдээгүй байна