АНУ-ын Ерөнхийлөгч Дональд Трамп корона вирусийн тархалт газар авч байгаатай холбоотойгоор ирэх арваннэгдүгээр сард болох ёстой Ерөнхийлөгчийн сонгуулийг хойшлуулах боломжийг санал болгожээ. Тэрээр Twitter дээрээ “Шуудангаар нийтээр санал өгөх болсноор (илүү сайн зүйл болох баталгаажсан үнэмлэхээр санал өгөх бус) 2020 он нь түүхэн дэх хамгийн шударга бус бөгөөд бодит бус болж хувирна. Энэ бол АНУ-ын хувьд гутамшиг болно. Хүмүүс зөв, найдвартай бөгөөд аюулгүй саналаа өгөх болтол нь сонгуулийг хойшлуулах уу?” гэж бичсэн байна.
АНУ-д корона вирусийн халдвар авсан 4,4 сая хүн бүртгэгдэж, энэ халдварын улмаас 150,7 мянган хүн нас бараад байгаа тул сонгуулийн байранд биеэр санал өгөх нь халдварыг улам тархаах аюул дагуулаад байгаа юм. Долоодугаар сарын 28-нд Конгресст болсон сонсголын үеэр АНУ-ын Хууль зүйн сайд, Ерөнхий прокурор Уильям Барр нь арванэгдүгээр сарын сонгуульд шуудангаар саналаа өгөх нь худал үр дүнд хүргэж магадгүй байгаа талаар мэдэгдсэн.
Сонгуулийн кампанит ажлын санхүүжилтийн талаарх хуулийн хэрэгжилтийг хянадаг АНУ-ын Холбооны сонгуулийн комиссын гишүүн, Ардчилсан намын Эллен Уайтрауб нь Трампын энэ саналын хариуд Twitter дээрээ “Үгүй шүү, ноён Ерөнхийлөгч өө. Үгүй. Танд сонгуулийг хойшлуулах бүрэн эрх байхгүй. Хойшлуулах хэрэг ч байхгүй” гэж бичсэн байна.
Цар тахлын улмаас Ерөнхийлөгчийн сонгуулийг хойшлуулах боломж бараг тэгтэй тэнцүү тухай хуульчид, мэргэжилтнүүд эртнээс анхааруулж байсан аж. Сонгуулийг хойшлуулахын тулд 1845 онд батлагдсан Ерөнхийлөгчийн сонгуулийн тухай Хуульд заасан “арваннэгдүгээр сарын эхний даваа гарагийн дараах мягмар гарагт” гэсэн заалтыг өөрчлөх ёстой болно. Үүний тулд өөрчлөлтийг Конгрессын Төлөөлөгчдийн танхим ба Сенат баталж, дараа нь Трамп гарын үсэг зурах ёстой. Гэтэл Төлөөлөгчдийн танхимд Ардчилсан нам олонх байгаа тул онц содон, ер бусын гайхамшигт зүйл тохиолдохгүй л бол Бүгд найрамдах намаас сонгогдсон Трампын саналыг дэмжихгүй гэжээ.
Ингээд зогсохгүй сонгуулийг цуцлах асуудал ч бүтэхгүй гэдгийг анхааруулж. Учир нь, АНУ-ын Үндсэн хуулийн 20 дугаар нэмэлт өөрчлөлтөд Ерөнхийлөгч ба дэд Ерөнхийлөгчийн бүрэн эрх дуусах хугацааг албан тушаалдаа орсноос хойш дөрвөн жилийн дараа “нэгдүгээр сарын 20-ны үд дундад дуусгавар болно” гэж заасан байдаг юм байна. Тэгэхээр цар тахлаас болж сонгуулийг цуцаллаа ч он гарснаас 20 хоногийн дараа Трамп ба дэд Ерөнхийлөгч Майкл Пенс нар нь бүрэн эрхгүй болж хувирна.
26°C
Сэтгэгдэл (3)