Оросын Эрүүл мэндийн яамнаас иргэддээ хандан корона вирусийн эсрэг вакцин хийлгэсний дараа архи, согтууруулах ундаа хэрэглэж болохгүй талаар анхааруулжээ. Наймдугаар сарын 11-нд ОХУ нь корона вирусийн эсрэг вакциныг “Спутник V” гэсэн нэрээр албан ёсоор бүртгэсэн. Үүнтэй холбогдуулан Оросын ЭМЯ-ны наркологийн ерөнхий мэргэжилтэн Евгений Брюн нь корона вирусийн эсрэг вакцин хийлгэсний дараа архи, согтууруулах ундаа хэрэглэж болохгүй гэж мэдэгдсэн байна. Брюн нь архи, согтууруулах ундаа нь вакцины нөлөөг сулруулахаас гадна дархлаанд сөрөг нөлөөтэй гэдгийг онцолжээ.
Оросын “Спутник V” вакцин нь 2021 оны нэгдүгээр сараас эхлэн иргэдэд хүртэмжтэй тоогоор үйлдвэрлэж эхлэх юм байна. Вакциныг 18 нас хүрээгүй, хөл хүнд хүмүүст хийхгүйгээс гадна вакцины найрлагад ордог бодисуудад мэдрэг хүмүүс, халдварт ба халдварт бус хурц хэлбэрийн өвчин эмгэгтэй хүмүүст хийхгүй юм байна. Мөн вакцин хийх өдөр хүний биеийн дулаан 37 градусаас ихгүй байх ёстой гэжээ. ОХУ –д вакциныг сайн дурын үндсэн дээр хийх юм байна.
Дэлхийн 20 гаруй улс орон Оросын “Спутник V” вакцинаас нэг тэрбум тун худалдан авах захиалга өгөөд байгаа тухай Оросын шууд хөрөнгө оруулалтын сангийн тэргүүн Кирилл Дмитриев мэдэгдсэн байна.
Сэтгэгдэл (0)
Сэтгэгдэл бичигдээгүй байна