Есдүгээр сарын 1-ээс эхлэн Герман, Францад үйлдвэрлэсэн мармелад, жимсний чанамал зэрэг бүтээгдэхүүнийг АНУ руу импортлоход гаалийн нэмэлт татвар авч байхаар болсон тухай “Deutsche welle” агентлаг мэдээлсэн байна. Америк нь энэ мэтээр Европын холбоонд үйлдвэрлэгдсэн олон нэр төрлийн бүтээгдэхүүнд жилдээ нийт 7,5 тэрбум долларын нэмэлт татвар ногдуулахаар болж байгаа тухай Худалдааны хэлэлцээр дэх АНУ-ын төлөөлөгчийн газраас мэдээлсэн байна.
АНУ нь “Boeing” компанид, Европын холбоо нь “Airbus” компанид тус тус шударга өрсөлдөөний тухай хуулийг зөрчин хөнгөлөлт эдлүүлж байсан гэдэг шалтгаанаар АНУ ба Европын холбооны гишүүн улсуудын хооронд худалдаан маргаан дэгдсэн ийнхүү нэмэлт татвар ногдуулахын эхлэлийг тавьсан юм байна. Талууд харилцан нэгнээ буруутгаж байгаад 2004 оны аравдугаар сарын 6-нд Дэлхийн худалдааны байгууллагад нэгэн зэрэг гомдол явуулсан аж. Энэ маргааныг ДХБ удаан авч хэлэлцсэний эцэст 2018 оны тавдугаар сард “Airbus” компанид Европын холбооноос хөнгөлөлт үзүүлж байсан нь “Boeing”-ийн эрхийг шамшигдуулсан хэрэг мөн гэсэн шийдвэр гаргасан юм. Энэ шийдвэрийн дараагаар АНУ нь хариу болгож Европын холбоонд их хэмжээний торгууль ногдуулна гэж анхааруулаад байж. Гэтэл 2019 оны гуравдугаар сард ДХБ нь АНУ-ын Засгийн газраас “Boeing”-ийг хууль бусаар дэмжин “Airbus”-ын эрх ашгийг шамшигдуулж байсан гэсэн дүгнэлтийг бас гаргасан байна. Өөрөөр хэлбэл Европын холбоо ч АНУ-ын эсрэг торгуулийн арга хэмжээ авах боломжтой болсон.
Гэтэл тэр жилийнхээ аравдугаар сарын 2-нд ДХБ нь Америкийн Засгийн газрыг Европын холбоон бүтээгдэхүүнд гаалийн нэмэлт татвар ногдуулах эрхтэй гэсэн шийдвэр гаргасан. Энэ шийдвэр ёсоор жил болгон нийт 7,5 тэрбум долларын нэмэлт татварыг Европын бараа бүтээгдэхүүнд ногдуулах эрхтэй бөгөөд нэмэлт татварын хэмжээ нь 100 хувь хүртэл байж болно гэсэн байна.
Үүний дараа АНУ нь Европын холбооноос нийлүүлж байгаа иргэний агаарын тээврийн онгоцнуудад 10 хувь, хөдөө аж ахуйн бүтээгдэхүүн 25 хувийн татвар тус тус нэмж ногдуулахаар шийдсэн юм. Эдгээр бүтээгдэхүүний тоонд ном, нэхмэл эдлэл, кофе, дарс, бяслаг, чидун жимсний тос гэх мэт Франц, Герман, Испани, Их Британи зэрэг улсуудад гол төлөв үйлдвэрлэгдсэн бүтээгдэхүүн оржээ. Эдгээр улсууд нь “Airbus” компанид янз бүрийн хөнгөлөлт үзүүлж байсан гол улсууд гэж үзсэн учраас ийнхүү бүтээгдэхүүнүүдэд нь нэмэлт татвар ногдуулж байгаа юм байна.
Сэтгэгдэл (0)
Сэтгэгдэл бичигдээгүй байна