Европын холбооны гишүүн 27 орны Гадаад хэргийн сайд нар баасан гарагт хуралдан Беларус дах эсэргүүцлийн жагсаалыг эрх баригчид нь хүч хэрэглэн тарааж байгаагийн эсрэг хориг арга хэмжээ авах талаар нэгдмэл арга хэмжээ авахаар тохиролцжээ. Энэ удаад Беларусын жирийн иргэдийн эрх ашгийг хөндөлгүйгээр, тайван жагсаалын эсрэг хүч хэрэглэсэн болон сонгуулийн үр дүнг хуурамчаар үйлдсэн хүмүүсийг нэр заан хориг арга хэмжээ авахаар болсон байна. Улмаар гишүүн орнуудын ГХЯ-ын тэргүүнүүд нь Европын холбооны дипломат албадад хориг арга хэмжээнд нэр заагдах Беларусын албан тушаалтнуудын жагсаалтыг гаргахыг даалгасан байна.
Шведийн Гадаад хэргийн сайд “SVT” сувагт ярилцлага өгөхдөө “...Эдгээр хориг арга хэмжээ нь Беларусын ард түмнийг хөндөх ёсгүй гэдэгтэй бүгд санал нийлсэн” гэжээ.
Европын холбоо нь 2004 оноос Беларусын эсрэг хориг арга хэмжээ авч эхэлсэн байдаг. Анхлан 1999-2000 онуудад сөрөг хүчний хоёр идэвхтэн сураггүй алга болсны хариуд хориг арга хэмжээ аваад 2011 онд Ерөнхийлөгчийн сонгуулийг олон улсын стандартыг зөрчиж явуулсан гэж хориг арга хэмжээг өргөсгөсөн. Беларусын эрх баригчид улс төрийн хэлмэгдүүлэлт явуулахдаа ашиглаж болзошгүй гэж үзсэн техник, тоног төхөөрөмж болон цагдаагийн хүчний зэвсэг, тусгай хэрэгсэл нийлүүлэхийг хориглож, төрийн өмчийн зарим компаниуд болон олон тооны албан тушаалтнуудыг эсрэг нэр заан хориг арга хэмжээ аваад байсан юм. Гэхдээ 2016 онд Лукашенког Украйны хямралыг шийдэхэд идэвхтэй оролцон Европын холбооны байр суурийг дэмжиж байсны төлөө хориг арга хэмжээг зөөллөж, 170 албан тушаалтан, түүний дотор Лукашенког хар жагсаалтаас хасаж, төрийн өмчийн гурван компанийг хориг арга хэмжээнээс гаргаад байсан аж.
Сэтгэгдэл (0)
Сэтгэгдэл бичигдээгүй байна