Баримт: Сөгнөгөрийн ам сүйрэлд хүрчээ

Ойн цэвэрлэгээ нэрээр ой модыг хядаж байгаа талаарх нутгийн иргэдийн мэдээллийн мөрөөр Зариг.мн сайтын сурвалжлагч Н.Өнөрцэцэг, Э.Сугарсүрэн нар нутгийн иргэдийн хамт Төв аймгийн Батсүмбэр сумын Сөгнөгөрийн аманд 2020 оны наймдугаар сарын 19-нд ажиллав. 

Сөгнөгөрийн ам нь 40 гаруй булагтай салаагаас бүрдэх бөгөөд манай сурвалжлах баг дөнгөж нэг салаагаар нь морьтой явж мэдээлэл цуглуулж амжив. Өнөөдрийн байдлаар тус амнаас гурван компани мод бэлтгэдэг бөгөөд тэд тусгай тоноглосон “Зил-31” автомашинаар өдөрт 7-8 автомашин мод зөөж тухайн ойр орчмын замыг автомашин явах боломжгүйгээр сүйтгэжээ. Малчид тус амруу орж хадлан, тэжээлээ базааж чадахгүй болоод удаж байна.
Эргэн тойрон ой мод, хоржигнон урсах голын чимээ, дөрөө шүргэсэн олон төрлийн өвс ургамал гээд дуунд мөнхөрсөн “Сөгнөгөрийн гол” -ыг дагаж таван цаг гаруй мориор явав. Морь явахын аргагүй хөндлөн унасан мод байгаагаас харахад ойн цэвэрлэгдээгүй, энд тэндгүй давирхай нь гоожсон хойтон хожуулыг харахад ой сүйдсэнийг хэн ч хараад ойлгохоор байна. Бидний очсон Сөгнөгөрийн амны нэгэн салаанд 100 гаруй залуу нойтон модыг тайрсан нь толгойгоо их биетэйгээ тасдуулсан хожуул нь гэрчилнэ. Шатсан мод, толгойгоо тасдуулсан хожуул, өгөрсөн мод гээд дайн болсон мэт ундуй сундуй байдал биднийг угтсан юм. Хан хэнтий нуруу, Асралт хайрхан, Сөгнөгөрийн ам гээд айлсан байх эдгээр хангайгаас өдөр шөнөгүй зил-31 автомашинаар дэвш дүүрэн мод зөөж байна. Тэд ой цэвэрлэх нэрээр ойг сүйтгэж байгааг Цагдаагийн ерөнхий газар, Байгаль орчин ногоон хөгжлийн яам, Мэргэжлийн хяналтын ерөнхий газар, Сум орон нутгийн удирдлагууд анхааралдаа авч шалгах зайлшгүй шаардлагатай байна.