Эрүүл мэндийн салбарыг эмчлэх хуулийг баталлаа

УИХ-ын гишүүн М.Оюунчимэг, Ц.Мөнх-Оргил, Ж.Чинбүрэн, Ц.Туваан нар Төрийн ордонд мэдээлэл хийж УИХ-ын ээлжит бус чуулганаар эрүүл мэндийн салбарт томоохон реформ хийгдсэн гэж мэдэгдлээ. Өөрөөр хэлбэл эрүүл мэндийн салбарын гол хуулиудад нэмэлт өөрчлөлт оруулж эрх зүйн орчныг санхүүжилттэй нь хамт шийдэж чадсан гэв. Тухайлбал, УИХ-ын Нийгмийн бодлогын байнгын хороогоор "Эрүүл мэндийн даатгалын тухай", "Эрүүл мэндийн тухай", "Эмнэлгийн тусламж үйлчилгээний тухай", "Эм эмнэлгийн хэрэгслийн тухай" хуулиудад нэмэлт өөрчлөлт оруулсан. Үүний гол ач холбогдол нь бизнес тоног төхөөрөмж дагасан биш хүндээ төвлөрсөн хуулийн өөрчлөлтийг хийж, асуудлыг дэд бүтэц, санхүүжилттэй нь хамт шийдсэн өөрчлөлт болж чадсан гэдгийг онцоллоо. 

Энэ тухай УИХ дахь Нийгмийн бодлогын байнгын хорооны дарга М.Оюунчимэг хэлэхдээ: “Жирэмсэн эмэгтэй заавал харьяа дүүргийн эмнэлэгт үзүүлэх ёстой өөр газар үзүүлэх боломж байдаггүй, жоохон хүндрэлтэй бол ЭХЭМҮТ-д үзүүлэх гэхээр манай харьяалал биш гээд явуулдаг гэх мэт иргэдэд учирдаг хүндрэлүүд олон байдаг. Тэгвэл энэ хүндрэлийг арилгаж чадлаа. Өөрөөр хэлбэл даатгал төлдөг л бол та эрүүл мэндийн даатгалын сантай гэрээ хийсэн аль ч эрүүл мэндийн байгууллагаар үйлчлүүлэх боломжтой. Энэ мэтчилэн эрүүл мэндийн салбарт сүүлийн 20 гаруй жил яригдсан реформ хийх хуулийн өөрчлөлтүүд орсон” гэж тодотголоо.