Олон улсын “Henley & Partners” консалтингийн компаниас гардаг паспортын индексийн энэ оны эхний жагсаалт хэвлэгдсэн байна. “Henley Passport Index” гэж нэрлэгддэг энэхүү жагсаалт аль улсын иргэд нэвтрэх виз авалгүй эсвэл газар дээр нь виз авах замаар паспортоороо чөлөөтэй зорчих илүү боломжтой байдгийг харуулдаг.
2021 оны жагсаалтад Японы улсын гадаад паспорт нэгдүгээрт орсон байна. Японы паспорттой хүн дэлхийн 191 орноор визгүй зорчих эрхтэй. Хоёрдугаарт, Сингапурын паспорт орсон. Энэ улсын паспортоор дэлхийн 190 улсаар визгүй зорчих бол Герман, Өмнөд Солонгосын паспортоор адилхан 189 орноор визгүй зорчих боломжтой. Айргийн талд 188 орноор визгүй зорчуулдаг Финландын паспорт орсон байна.
Харин манай улсын паспортоор дэлхийн 62 оронд визгүй зорчих боломжтой гэдгээрээ Африкийн Бенин, Мозамбик гэсэн хоёр улстай зэрэгцэн 81 дүгээр байранд оржээ. Харин хамгийн “нэмэргүй” паспорттой улсаар Афганистан улиран тодорсон байна. Энэ улсын паспортоор ердөө 26 улсад визгүй зорчих боломжтой байдаг аж. Хоёр хөршийн тухайд ОХУ-ын паспортоор 116 улсад визгүй зорчих бол БНХАУ-ын паспортоор 75 улсад визгүй зорчдог юм байна.