Нидерландын гаалийн ажилтнууд Их Британиас Европын холбоо руу орж ирсэн жолооч нарын идэхээр авч явсан гахайн утсан махтай хачиртай талхнуудыг хураан авч байгаа тухай Нидерландын “Een Vandaag” суваг мэдээлсэн байна. Их Британи Европын холбооноос гарч хүсэн хүлээсэн “Брексит”-ээ хэрэгжүүлсэн учраас ийм байдал үүсжээ.
“Een Vandaag” сувгийн бэлдсэн сурвалжилгаар Европын холбооны хилээр орж ирж байгаа Британийн машинуудад гаалийнхан үзлэг хийж байгаа харуулжээ. Гаалийнхан шалгах явцад нэг жолоочоос гахайн утсан махтай хачиртай талх байгаа хараад шууд хураасан байна. Жолооч үүнд ихэд гайхан утсан махыг нь өгөөд талхыг нь авч үлдэж болох талаар асуухад гаалийн ажилтнууд “Үгүй. Бүгдийг хурааж авна. Brexit-д тавтай морил эрхэм ээ. Харамсалтай байна” гэсэн хариу өгч байсан байна.
Их Британи нь он гарахаас өмнө Европын холбоотой “Brexit”-ийн талаар гэрээ байгуулж амжсан юм. Он гарахаас өмнө гэрээ байгуулж чадаагүй бол Британи ба Европын холбоо нь дэлхийн худалдааны байгууллагын дүрмээр худалдаа явуулахаас өөр аргагүй болох ёстой байв. Хэрэв тэгсэн бол Британийн эдийн засаг жил болгон 2 хувиар багасаж, ажилгүйдлийн хэмжээ 8 хувьд хүрч магадгүй байсан аж.
Сэтгэгдэл (0)
Сэтгэгдэл бичигдээгүй байна