2021/02/27
USD 2,811

Цагаачдын цувааг цэрэг, цагдаагийн хүчээр тараажээ

О.Шүрэнцэцэг
2021/01/19

Олон мянган хууль бус цагаачдын цуваа Гондурас улсаас гарч АНУ-ыг чиглэн хөдөлсөн тухай бид өмнө нь мэдээлж байсан. Гондурасын цагаачид хөрш Гватемал улсын хилээр шалгалтгүйгээр, өөрөөр хэлбэл хууль бусаарнэвтэрч, Мексикийн хилийг зүглэн хөдлөх зуураа сонгогдсон Ерөнхийлөгч Байденд хандан, сонгуулийн өмнөх амлалтаа биелүүлж, өөрсдийг нь найрсгаар угтан авч, ажил, орон байр олгоно гэдэгт найдаж байгаагаа илэрхийлсэн.

 Одоо Гватемалд зургаан мянга гаруй Гондурас цагаачид орж ирээд байгаа юм байна. Орох оронгүй, хоол ундгүй цагаачид ингэж олноор гэнэт орж ирнэ гэдэг гэмт хэрэгт тэртээ тэргүй өндөр байдаг ядуу орны хувьд маш хүнд дарамт болдог. Иймд эрх баригчид цагдаа, цэргийн хүч ашиглан хууль бус цагаачдын цувааг тарааж, нутгаасаа албадан гаргахаар шийджээ. Үүний тулд заримыг нь албадан Гондурас руу буцааж байгаа бол заримыг нь хилийн дагуу шинээр байгуулсан шалган нэвтрүүлэх цэгээр Мексик руу гаргаж байна. 

 Трамп 2020 оны аравдугаар сард АНУ-ыг зорьсон олон мянган хүнтэй цувааг зогсоож, цагаачдыг нутаг буцаахгүй бол жил бүр олгодог санхүүгийн тусламжаа зогсооно гэж сүрдүүлсний дараа Гватемалын цагдаа, цэргийнхэн хоёр мянга гаруй хүнтэй хууль бус цагаачдын цувааг зогсоон тарааж, дийлэнхийг нь нутаг руу нь буцааж чадсан бөгөөд ердөө 100 хүн Мексикийн хилээр давж гарч чадсан байдаг.

 


Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна