Киргиз улс нь техникийн шалтгааны улмаас “Pfizer” компанийн вакцинаас татгалзахаар шийдээд байгаа тухай тус улсын Эрүүл мэндийн сайд Алымкадыр Бейшеналиевмэдэгджээ. Сайд ярихдаа “Манайд хасах 70 хэмийн хүйтэн хадгалагдах ёстой Америкийн “Pfizer” вакциныг санал болгосон. Нэг бүр нь 4000 долларын үнэтэй тийм хөргөгч манайд байхгүй. Төсөвт ч тийм мөнгө байхгүй тул татгалзахаас өөр арга алга” гэжээ. “Pfizer” вакциныг хүлээн авах, шаардлагатай нөхцөлд хадгалж, тээвэрлэхийн тулд Киргиз ул нь 2 сая долларын тусгай тоног төхөөрөмж худалдан авах шаардлагатай болсон байна.
Киргиз нь “COVAX” хөтөлбөрийн хүрээнд 1 сая тун “Pfizer” вакцин авах ёстой байсан ч ийнхүү татгалзахаас өөр аргагүй болж байгаа тул ойрын үед хадгалалтын нөхцөлөөр арай боломжийн, өөр вакцин захиалахаар шийдсэн аж.
Киргиз нь ОХУ-аас "Спутник V" вакцин авах хоёр талт хэлэлцээ явуулж байгаа юм байна. Оросын вакцин нь хасах 2-оос хасах 18 градуст хадгалах ёстой, Киргизэд ч ийм тоног төхөөрөмж байгаа юм байна.
Киргиз нь 6,5 сая хүн амтай бөгөөд корона вирусийн халдварыг 82 мянган хүн авч, 1390 хүн нас барсан байна. Дашрамд сонирхуулахад, Киргизэд 2005, 2010, 2020 онуудад тус тус олныг хамарсан бослого үймээн дэгдсэн нь хувьсгал болон хувирч тухай бүрд төр эргэж байсан юм. Төрийн эргэлт, хувьсгалын тоогоор Төв болон Дундад Азид дээд амжилт тогтоогоод байгаа гэж болно. Төв Азийн хамгийн “хувьсгалч” улс харамсалтай нь санхүүгийн хувьд нэлээд бэрхшээлтэй байгаа бололтой.
Сэтгэгдэл (0)
Сэтгэгдэл бичигдээгүй байна