Их Британийн бар, пабууд цар тахал эхэлснээс хойш 87 сая пинт буюу 43,5 сая литр шар айраг хаяж устгалд оруулсан тухай Британийн шар айраг ба пабуудын ассоциаци “BBPA” мэдээлсэн байна. Энэхүү устгалд оруулсан 87 сая пинт шар айргийг борлуулсан бол эздэдээ 331 сая фунт буюу 453 сая долларын орлого оруулах байсан аж. Иймд “BBPA” Засгийн газартаа хандан хүнд байдалд орсон салбарынхаа НӨАТ-ыг багасгах шийдвэрийг сунгах, шар айргийн татварыг бууруулахыг уриалсан байна. Британийн пабууд нь шар айраг зарж борлуулсныхаа төлөө адил үйлчилгээ явуулдаг Герман эсвэл Испанийн пабуудаас 11 дахин өндөр татвар төлдөг байсан юм байна. Тиймээс борлуулалт байхгүй ийм хүнд үед төрийн зүгээс дэмжлэг үзүүлэхгүй олон мянган паб дампуурах нь гарцаагүй болоод байгааг “BBPA” онцолжээ.
Үүний өмнөхөн Их Британийн Засгийн газраас хөл хорионы үеэр хаагдсан пабуудад 40 сая фунтын тусламж үзүүлэхэд бэлэн байгаагаа мэдэгдээд байсан юм.
Үүнээс гадна Германы шар айргийн үйлдвэрлэгчид олон сая литр сайн чанарын бүтээгдэхүүн устгалд оруулахаас өөр аргагүй болж байгаад гомдол мэдүүлжээ. Германы шар айраг үйлдвэрлэгчдийн нэгдэл “Deutscher Brauer-Bund” буюу “DBB” энэ тухай мэдээлсэн байна. Цар тахлын үеийн хөл хорионоос болж үйлдвэрлэгчид нь хадгалалтын хугацаа богинотой асар их хэмжээний шар айраг борлуулж чадаагүй байна. Үүнээс болоод шар айраг үйлдвэрлэгчид олон сая еврогийн хохирол амсаад байгаа аж. “DBB”-ийн мэдээлснээр Германд 1500 гаруй шар айргийн үйлдвэр дампуурлын ирмэг дээр ирээд байгааг онцолсон байна. Эдгээр нь гол төлөв дэлхийн хоёр ч том дайн, эдийн засгийн болон санхүүгийн олон удаагийн хямралыг давж гарч ирсэн гэр бүлийн жижиг ба дунд үйлдвэрүүд байгаа юм байна.
Сэтгэгдэл (0)
Сэтгэгдэл бичигдээгүй байна