БНХАУ-д хилийн чанадаас ирж байгаа хүмүүсээс COVID-19-ийн шинжилгээ авахдаа зөвхөн шулуун гэдэсний арчдас авах аргыг ашиглаж байхаар болсон тухай Британийн “The Times” мэдээлж байна. Хятадын эрх баригчид шулуун гэдэснээс арчдас авахыг хамар залгиураас арчдас авснаас хавьгүй найдвартай гэж үзэж байгаа тул ийм шийдвэр гаргасан гэж байна. Одоогоор гадаадын иргэдээс шулуун гэдэсний арчдас авах эхний цэгүүдийг Бээжин, Шанхайн нисэх буудлуудад байгуулаад байгаа аж.
Тийм ч таатай биш энэ аргыг манай урд хөршид нэгдүгээр сарын сүүлээс өргөнөөр ашиглах болсон гэж байна. Корона вирусийг илрүүлэх магадлал илүү өндөр учир эхлээд сургуулийн дотуур байрны хүүхэд, багш нараас авч байсан. Яваандаа Хятад руу хилийн чанадаас ирсэн иргэдээс авах болсон.
Хоёрдугаар сарын эхээр АНУ-аас Хятадад байрлах дипломат төлөөлөгчийн газрын ажилтнууд анхлан Хятадын судлаачид тэднээс корона вирусийн давтан шинжилгээ заавал өгөхийг шаардаад, авах болохоороо шулуун гэдэснээс арчдас авч, сэтгэл санааны дарамтад оруулж байна гэж гомдоллосон. Удаолгүй Хятад дах Японы элчин сайдын газрын ажилтнуудаас мөн л ийм эвгүй аргаар заавал шинжилгээ авч байгаа тухай гомдол ирж, Засгийн газар нь дипломат шугамаараа Хятадын Гадаад яаманд эсэргүүцэл илэрхийлээд авсан байна.
Харин одоо зөвхөн АНУ эсвэл Японы дипломатууд гэлтгүй хилийн чанадаас ирсэн л бол ийнхүү таагүй байдлаар шинжилгээ өгөх ёстой болжээ.
Сэтгэгдэл (0)
Сэтгэгдэл бичигдээгүй байна