Монгол Улсын Ерөнхийлөгчийн 2021 оны ээлжит сонгуулийн үр дүнд Ерөнхийлөгчөөр сонгогдон У.Хүрэлсүх маргааш /2021.06.25/ тангаргаа өргөж ажилдаа орно. Тангаргаа өргөсний дараа ҮАБЗ-ийн анхны хуралдааныг хуралдуулж ирэх долдугаар сарын 1-ний өдрөөс дуусах төрөөс үзүүлж буй зарим хөнгөлөлтийг үргэлжлүүлэх эсэхийг хэлэлцэнэ гэдгийг өмнө нь мэдэгдсэн.
Тэгвэл уг хуралдааныг маргааш хуралдуулахаар төлөвлөжээ. Энэ хүрээнд хуралдааны бэлтгэл ажлыг ҮАБЗ-ийн Нарийн бичгийн дарга А.Гансүх хангаж, дээрх асуудлаар холбогдох судалгаа, хуралдааны материалыг ирүүлэхийг Шадар сайд С.Амарсайханд даатгасан байна.
Тодруулбал, үндсэн дөрвөн асуудлыг ҮАБЗ-ийн анхны хуралдаанаар хэлэлцэхээр төлөвлөсөн талаар эх сурвалж мэдээллээ. Үүнд:
- 18 нас хүртэлх хүүхэд бүрт олгож байгаа хүүхдийн 100 мянган төгрөгийн мөнгөн тэтгэмжийг 2021 оны арванхоёрдугаар сарын 31-ний өдрийг хүртэлх хугацаанд олгох, цаашид энэхүү арга хэмжээг Монгол Улсын 2022 оны төсөвт тусган үргэлжлүүлэн хэрэгжүүлэх,
- Айл өрхийн болон зарим аж ахуй нэгж, байгууллагын цахилгаан, дулааны эрчим хүч, дулааны уур хэрэглэсний төлбөр, цэвэр, бохир усны үйлчилгээний төлбөр болон энгийн хог, хаягдлын үйлчилгээний хураамжийг “Эрдэнэт үйлдвэр” ТӨҮГ-аас хариуцан төлж байгаа арга хэмжээг 2021 оны арванхоёрдугаар сарын 31-ний өдрийг хүртэлх хугацаанд үргэлжлүүлэн хэрэгжүүлэх,
- Нийслэлийн гэр хорооллын иргэдэд дэмжлэг үзүүлэх зорилгоор сайжруулах шахмал түлшний нэг тонн тутмын үнийг 2021 оны есдүгээр сарын 15-наас 2022 оны дөрөвдүгээр сарын 15-ны өдрийг хүртэлх хугацаанд 50 хувиар хөнгөлөх арга хэмжээг “Эрдэнэс Тавантолгой” ХХК-иас санхүүжүүлэн хэрэгжүүлэх,
- Коронавирусийн халдвар цар тахлаас урьдчилан сэргийлэх, тэмцэх зорилгоор эрүүл мэндийн салбарын хөрөнгө оруулалтыг нэмэгдүүлэх асуудлыг Монгол Улсын 2021 оны төсвийн тодотголд тусгах гэсэн асуудлаар хуралдах юм байна.
10°C
Сэтгэгдэл (130)