СБД-ийн 19-р хороо Хандгайтын ойн бүсэд газрыг сүйтгэж, 20 гаруй барилгын суурь цутгасан байгааг бид мэдээлсэн. Манай мэдээллийн мөрөөр тухайн газарт Экологийн цагдаагийн алба, Нийслэлийн байгаль орчны газраас очиж ажилласан.
Ойн бүсэд Г.Гансүх гэх иргэний захиалгаар барилгын ажил явуулсан бөгөөд тус газар нь СБД-ийн Засаг даргын захирамжаар зөвшөөрлийг олгосон байсныг Нийслэлийн газар зохион байгуулалтын албанаас цуцлахаар болжээ.
Эх сурвалжийн мэдээллээр "Хандгайт велла” гэх хотхон барихаар энэ оны гуравдугаар сарын 23-нд үйл ажиллагаа эхлүүлж, барилгын ажил явуулж байсныг тус ойн ангийн байцаагч н.Хүрэлсүх нь ойн бүсийг сүйтгэж байна гэдэг үндэслэлээр зөрчлийн хэрэг үүсгэж таван сая төгрөгийн торгууль ногдуулж байжээ. Харин тус газарт зөвшөөрөл авсан гэх байдлаар байгаль орчныг сүйтгэж ажлаа үргэлжлүүлсээр байсан талаар Нийслэлийн байгаль орчны газраас мэдээлж байна.
Одоогоор энэхүү асуудлыг Экологийн цагдаагийн албанаас шалгаж байна. Бид мэдээллийг утсаар н.Гансүх гэх иргэнээс тодруулахад ойн бүсэд өөрийн болон ах, дүү нарынхаа хэд хэдэн зуслангийн байшинг бариулж байгаа гэх мэдээллийг өгсөн байдаг. Экологийн цагдаагийн албанаас болон холбогдох байгууллагуудаас иргэн н.Гансүхийг дуудахад “ковидын халдвар авсан тул очих боломжгүй” гэх тайлбарыг өгчээ.
Хандгайтын ойн хичнээн га талбайд нөхөн сэргээлт хийх шаардлагатай, нөхөн сэргээлт хэрхэн хийхийг үргэлжлүүлэн сурвалжилан хүргэх болно.
28°C
Сэтгэгдэл (23)