Мексикт сугалаагаар 20 сая песо /ойролцоогоор 300 сая төгрөг/ хожсон цэцэрлэгийн ажилтнууд орон нутгийн дээрмийн бүлэглэлийн дарамтад ороод байгаа тухай “BBC” мэдээлсэн байна. Мексикийн өмнөд нутаг дах Чьяпас мужийн Окосинго нэртэй жижиг хотын цэцэрлэгийн хамт олон 2020 оны есдүгээр сард болсон Засгийн газрын сугалаагаар их хэмжээний мөнгө хожсон аж. Сугалааны тасалбарыг нэрээ нуусан хүн урьдчилан бөөнөөр нь худалдан аваад Мексикийн хамгийн ядуу сургууль, цэцэрлэгүүдэд тараасан байснаас нэг нь ийнхүү азтай байж.
Цэцэрлэгийн ажилтнууд, 20 хүүхдийн эцэг эх ийм мөнгө хожсондоо их баярлан, хожлыг цэцэрлэгийг тохижуулахад зарцуулахаа мэдэгдсэн байна. Гэтэл удалгүй тус хотод үйл ажиллагаа явуулдаг “Los Petules” нэртэй дээрмийн бүлэглэл цэцэрлэгийн ажилтнууд ба хүүхдийн эцэг эхчүүдийг дарамталж эхэлжээ. Гэмт этгээдүүд хөрш зэргэлдээ хотын дэрмийн бүлэглэлтэй дайн зарласан атал зэвсэг худалдаж авах мөнгөгүй болсон тул багш нар, эцэг, эхчүүд тэдэнд хожлынхоо мөнгөөр буу сум авч өгөх ёстой гэж мэдэгджээ.
Цэцэрлэгийн захиргаа, эцэг эхчүүдийн зөвлөл дээрэмчдийн шаардлагыг биелүүлэхээс татгалзан хожлын мөнгөний нэлээд хэсгийг цэцэрлэгт шинэ дээвэр хийлгэхэд зарцуулж орхижээ. Улмаар үлдсэн мөнгийг 2021 онд цэцэрлэгийн ойр орчмыг тохижуулахад зарцуулахаа мэдэгдсэний дараа дээрэмчид бүр гаарч ил цагаан сүрдүүлэх болж. Удалгүй буюу энэ оны гуравдугаар сард нэг хүүхдийн эцэг, эхийг буудаж хөнөөгөөд, аравдугаар сард цэцэрлэгт ирсэн эмэгтэйчүүд, хүүхдүүд рүү дайралт хийжээ. Үүний дараа азтай бас азгүй цэцэрлэгтэй холбоотой 28 гэр бүл хотоос зугтсан байна.
Бий болсон нөхцөл байдлын талаар эцэг, эхийн зөвлөл хотын болон орон нутгийн удирдлагад мэдэгдсэн тухай эцэг, эхийн зөвлөл мэдэгдээд цаашид дээрмийн бүлэглэлийн зэвсгийг хурааж, татан буулгаагүй цагт төрөлх гэр орондоо иргэж ирэх боломжгүй болсноо зарласан байна.
Сэтгэгдэл (0)
Сэтгэгдэл бичигдээгүй байна