Д.Ганбат: Засгийн газар Оюутолгойн гэрээг сайжруулахад санаачилгатай, сайн ажиллаж байна

УИХ дахь АН-ын бүлэг мэдээлэл хийлээ. УИХ дахь АН-ын бүлгийн дарга Д.Ганбат хэлэхдээ тэрбээр “Манай улсад  ус агаар шиг хэрэгтэй байгаа зүйл бол хариуцлагын асуудал юм. Сүүлийн хоёр жил орчим албан тушаалтнуудад хариуцлагын асуудлыг ярьсангүй. Харин БНСУ-д суугаа Элчин сайдыг эгүүлэн татах тухай шийдвэрийг сая Гадаад харилцааны яамнаас ярьсан. Энэ нь бага ч гэсэн ард иргэдийн төр засагтаа итгэх итгэлийг сэргээж байна. Бид өнөөдөр олон улсын өмнө маш ичгэвтэр байдалд байна. МАН өөрсдийгөө төрийн эрх барьж байгаа Азид анх удаагаа байгуулагдсан улс төрийн нам, улс төрийн ууган хүчин хэмээн ярьж байна.  Гэтэл өнөөдөр 3.3 сая хүн амтай өргөн уудам газар нутаг, баялагтай ийм улсын иргэд гадаадад хүнд нөхцөл байдалтай байна гэдэг өөрөө шившиг юм.

Энэтхэгт манай 600-аад хүүхдүүд шашны сургуульд сурдаг. Хувьсах зардлыг гадаадад суралцаж байгаа хүүхэд болгонд өгч байгаа юу. Энэ асуудалд анхаарал хандуулахыг Гадаад Харилцааны яам болон Боловсролын яаманд хүссэн.

Мөн БНСУ-ын хуваарьт нислэгээ эргэн сэргээхийг холбогдох албан тушаалтнуудад  хүсэлт тавилаа.

Ардчилсан намын УИХ-д суугаа гишүүд хил гааль, боомтын асуудалд шүүмжлэлтэй хандаж байгаа. Нөхцөл байдал шаардлагын хэмжээнд хүртэл сайжрахгүй байна. Бид бүхэн Эрээнээс хамааралтай байгааг АН-ын гишүүд шүүмжлэн ярилаа. Үүнд анхаарч ажиллах ёстойг сануулан хэлсэн" гэлээ.

Энэ үеэр сэтгүүлчдийн асуултад хариуллаа.

-Рио Тинтогийн талаас Монголын талын 34 хувьд ногдох 2,3 тэрбум ам.долларын өрийг 100 хувь тэглэх таван саналыг хүргүүлсэн.  Оюу Толгой гэрээг цаашид ямар байдлаар хийвэл ашигтай болно гэж үзэж байна вэ?

-Оюу Толгой геополитик болон манай эдийн засгийн хувьд чухал хөрөнгө оруулалт юм. Үе үеийн Засгийн газрууд энэ гэрээг сайжруулахын төлөө ажиллаж байсан. Үүнд Л.Оюун-Эрдэнийн Засгийн газар санаачилгатай сайн ажиллаж байна гэж харж байна. Ард иргэддээ үр өгөөжтэй гэрээ хэлэлцээ болоосой. Монголын ард түмэнд хэрэгтэй ийм зүйлийг хийж чадна гэдэгт итгэлтэй байна.