Дөрвөн хүний амь насыг аврах үйлст гар бие оролцсон Манай сэтгүүлч Н.Мижидмаад Онцгой байдлын байгууллагаас "Онц үйлстэн" шагналыг хүртээлээ.
Та бүхэндээ мэдээллийг эргэн сануулахад Сэлэнгэ аймгийн Ерөө сумын Бугант тосгон Эрээн гол гэдэг газарт самарт явсан 33-58 насны гурван эмэгтэй, нэг эрэгтэй төөрч, алга болоод 18 хонож байхад ар гэрийнхэн нь манай сайтад хандсан юм. Иргэдийн төөрсөн Эрээн гол гэх газар шигүү ойгоор хүрээлэгдсэн учраас машин, морь явах боломжгүй байсан. Иймд нисдэг тэргээр хайх шаардлага үүссэн юм. Харин ОБЕГ-аас “гурван хүний багтаамжтай жижиг нисдэг тэрэг нэг цаг нисгэхэд гурван сая төгрөг, том буюу найман хүний багтаамжтай нисдэг тэрэг нь хамгийн багадаа 16 сая төгрөг байсан учраас Зариг.мн сайтаар дамжуулан олон нийтийг сэтгэлийн дэмээ өргөхийг уриалсан хандивын аяныг өрнүүлж, хоёрхон өдрийн дотор онгоцны зардлыг бүрэн гүйцэт бүрдүүлж чадсан юм. Улмаар иргэдийг хайхаар ОБЕГ-ын алба хаагчид, ЗХЖШ-ын нисдэг тэргээр явж, дөрвөн иргэнийг эсэн мэнд гэр бүлд нь авч ирсэн юм. Дөрвөн иргэний хувьд өнөөдрийн байдлаар гэр бүл, үр хүүхдүүдтэйгээ эсэн мэнд, энх тунх амьдарч байна.
Онцгой байдлын байгууллагаас 2021 оноос эхлэн Онцгой байдлын албыг бэхжүүлж , гамшгаас хамгаалах үйл ажиллагаанд бодитой хувь нэмэр оруулсан иргэнд “Онцгой байдлын албаны онцгой үйлстэн” шагналыг олгож эхэлж байгаа аж.
Мөн "Онц үйлстэн" шагналаар шагнагдсан эрхмүүдээс дурьдахад, голын усанд живж байсан охиныг аварч амь насаа алдсан Э.Эрдэнэжаргал агсанд, 2015 онд дүүгийнхээ амийг цасан шуурганаас хамгаалж, өөрөө эрсэдсэн С.Золжаргал агсан нарыг ОБЕГ-аас нэхэн шагнасан юм.
Сэтгэгдэл (0)
Сэтгэгдэл бичигдээгүй байна