Хөгжлийн банкны томоохон, чанаргүй зээлдэгч нарын нэг "Нью Яармаг Хаусинг прожект" ХХК. Тус компани Хөгжлийн банкинд 117.9 тэрбум төгрөгийн өртэй бөгөөд компанийн захирал Ц.Ууганбаяр нь экс ерөнхийлөгч Х.Баттулгын орон тооны бус зөвлөхөөр 10 гаруй жил ажилласан ойрын хүн нь юм. Тэгвэл тус компани Хөгжлийн банкны барьцаанд тавьсан 21 ширхэг үл хөдлөх хөрөнгийг барьцаанаас чөлөөлүүлжээ.
Тодруулбал, Сүхбаатар дүүргийн Иргэний хэргийн анхан шатны шүүхийн 2019 оны гуравдугаар сарын 6-ны өдрийн тогтоолоор, Монгол Улсын Хөгжлийн банк, "Нью Яармаг Хаусинг прожект" ХХК-ийн хооронд байгуулсан 2015.09.23-ны өдрийн үл хөдлөх хөрөнгийн барьцааны гэрээ болон түүнд нэмэлт өөрчлөлт оруулсан 2016.02.19, 2016.11.22-ны өдрийн гэрээг тус тус хүчин төгөлдөр бус гэж үзэж, нийт 21 ширхэг үл хөдлөх хөрөнгийг барьцаанаас чөлөөлүүлсэн байна. Улсын дээд шүүхээс анхан шатны шүүхийн шийдвэрийг хэвээр үлдээх тогтоолыг 2019 оны зургадугаар сарын 25-ны өдөр гаргажээ.
Зээлээ төлөхгүй луу унжсан, чанаргүй зээлдэгч нарын жагсаалтыг үргэлжлүүлж шүүхэд шилжээд буй тус компанийн барьцаа хөрөнгийг чөлөөлөх хүртэл шийдвэрийг гаргасан нь анхаарал татаж байна. Хөгжлийн банкнаас зээл авсан компаниудын 25 хувь нь бодит барьцаагаар баталгаажаагүй нь асуудал дагуулахтай зэрэгцээд зээлийн барьцаа хөрөнгөө чөлөөлүүлээд эхэлсэн байна. Энэ нь Хөгжлийн банкнаас авсан зээлээ эргэж төлөхгүй гэж байгаатай агаар нэг.
Авсан зээлээ төлөхгүй бол барьцаа хөрөнгийг нь борлуулах замаар олгосон зээлээ нөхөх нь зарчим байтал зээлээ төлөхгүй луу унжиж байгаа компаниудын барьцаа хөрөнгийг чөлөөлөөд эхэлсэн нь хууль шүүхийн байгууллага хэнд үйлчилж байна вэ гэж хардахад хүргэж байна.
Сэтгэгдэл (0)
Сэтгэгдэл бичигдээгүй байна