Хөгжлийн банкны дэд захирал Б.Чойжилжалбуу зээл олгохдоо Боролзой ХХК-иас 27.2 сая төгрөгийн хахууль авчээ

Хөгжлийн банкны удирдлагууд зээл олгохдоо бусдад давуу байдал бий болгож, хариуд нь их хэмжээний авлигал авдаг байсан нь баримтаар нотлогдож байна. Энэ удаа Хөгжлийн банкны дэд захирлаар ажиллаж байсан Б.Чойжилжалбуу зээл олгохдоо“Боролзой” ХХК-иас 27.2 сая төгрөгийн авлигал авсан үйлдэл мөрдөн байцаалтын явцад ил боллоо.

Боролзой компанийн захирал Должидын Батбаяр бөгөөд түүний эзэмшдэг нэг компани нь Модун ХХК юм. Модун компани нь Хөгжлийн банкны чанаргүй зээлдэгч нарын нэг бөгөөд Хөгжлийн банкнаас 2019 онд 5.8 тэрбум төгрөгийн зээл авсан байдаг. Уг зээлийг олгоход Хөгжлийн банкны дэд захирал Б.Чойжилжалбуу нөлөөлж, 27.2 сая төгрөгийн авлигал авсан бололтой.

 
Дашрамд дурдахад Модун ХХК нь ХУД-ийн 10-р хороо, Спорт цогцолборын баруун урд талд байрлах 164 айлын орон сууц болон галлерей үйлчилгээний талбайтаагаар зохион байгуулах төсөл хэрэгжүүлэхээр зээл авсан бөгөөд өнөөдрийн байдлаар өрийн үлдэгдэл 7.3 тэрбумд хүрээд байгаа юм.
Нэмэлт мэдээлэл хүргэхэд Б.Чойжилжалбууг өнгөрсөн 2 дугаар сарын 21-ний өдөр Сүхбаатар дүүргийн эрүүгийн хэргийн анхан шатны шүүхээс түүнийг 15 хоног хорих шийдвэр гаргасан бөгөөд хорих хугацааг дахин 15 хоногоор сунгаад байгаа юм. Түүнийг ажилтнууддаа нөлөөлж, сүрдүүлсэн гэх үндэслэлээр хорьсон юм. Харин мөрдөн байцаах явцад түүнтэй холбоотой авлигын хэрэг ил болж байгаа нь энэ юм.