Л.Оюун-Эрдэнэ: Төсвийн хэмнэлттэй холбоотой бодлогын шинэчлэл хийнэ

Н.Мижидмаа
2022/04/19

Монгол Улсын Ерөнхий сайд Л.Оюун-Эрдэнэ Топ-100 аж ахуйн нэгжийн төлөөлөлтэй МҮХАҮТ-д уулзлаа. Засгийн газар 2022 оны улсын төсвийг тодотгохоор УИХ-д хуулийн төсөл өргөн мэдүүлэхээр боловсруулж байна. Ерөнхий сайд тодотголын төслийг бизнес эрхлэгчдэд танилцуулж, саналыг нь сонслоо.

Тэрбээр “Цар тахлын хөл хориотой үед та бүхэнтэй уулзаж, 10 их наяд төгрөгийн хөтөлбөрөө танилцуулж байснаас хойш нэг жил өнгөрсөн байна. Вакцины үр нөлөөгөөр энгийн амьдралын хэмнэлд шилжсэн ч гадаад нөхцөл байдал амаргүй байна. Үүнээс шалтгаалан 2022 оны улсын төсвийг тодотгохоос өөр аргагүй болсон. Тодотгол гурван хэсгээс бүрдэнэ. Нэгдүгээрт, үнийн өсөлттэй холбоотой хариу арга хэмжээ авах, хоёрт, Төсвийн хэмнэлтийн тухай хууль, гуравт, төвлөрлийг сааруулахад чиглэсэн арга хэмжээ багтаж байна. Цаашид аливаа хуулийн төслийг эхний хэлэлцүүлгээс өмнө МҮХАҮТ-аар дамжуулан аж ахуйн нэгжүүдээр хэлэлцүүлэх шинэ жишиг тогтоож байна” гээд бизнес эрхлэгчдийн үгийг сонслоо.

Аж ахуйн нэгжүүдийн төлөөлөл төртэй хэрхэн хамтарч ажиллах талаар Ерөнхий сайдаас асууж, татварын уян хатан бодлого, чадварлаг цомхон бүтэцтэй төр, ажиллах хүчний дутагдлын талаар болон Засгийн газраас дэвшүүлсэн Шинэ сэргэлтийн бодлого засаг захиргааны хамгийн бага нэгжид хүрч үйлчлэхгүй байгааг ярьлаа. Мөн энэ үеэр “Номин Холдинг” компанийн захирал А.Шагдарсүрэн “Манай улс гадаадаас ажиллах хүч авдаг. Дотоодод ажиллах хүч алга. Үйлдвэрлэгч орон болмоор байна. Ингэхийн тулд төрөөс татварын уян хатан бодлого баримтлах хэрэгтэй. Малынхаа түүхий эдийг дотооддоо бүрэн боловсруулмаар байна. Эдгээрийг эцсийн бүтээгдэхүүн болгодог тоног төхөөрөмж хилээр оруулж ирэхэд НӨАТ болон гаалийг татваргүй болгомоор байна” гэлээ.

Харин “Жүр Үр” ХХК-ийн захирал Б.Мөнхзул “Үнийн өсөлтийг бууруулах арга хэмжээний хүрээнд үйлдвэрлэгчдийн НӨАТ-ыг бууруулж болох уу. Аж ахуйн нэгжүүд их хэмжээний хөнгөлөлттэй зээл авбал хөрөнгө оруулалт хийх учраас төлөх хугацааг уртасгавал сайн байна. Одоо хүчин төгөлдөр үйлчилж буй хуулиар нийслэлээс 500 км-ээс хол зайд үйл ажиллагаа явуулж байгаа бол татварын хөнгөлөлт үзүүлнэ гэж заасан байдаг. Төвлөрлийг сааруулах бодлогын хүрээнд энэ зайг ойртуулах хэрэгтэй” гэсэн юм.

Мөн “Айтүүлс” компанийн захирал Б.Тамир “Төрийн цахим шилжилтийн ажлыг хувийн хэвшил дэмжиж хамтарч ажиллахад бэлэн байна. Мөн эрчим хүчний хэмнэлтэнд ч манай компани дэмжин оролцож байгаа. Тухайлбал, Дүнжингарав худалдааны төвийн урдах гудамжинд автомашины хөдөлгөөнөөр тодордог эрчим хүчинд хэмнэлттэй гэрэл суурилуулсан. Төр ийм ажлыг хувийн хэвшилд өгвөл хийхэд бэлэн байна” гэлээ.

Ерөнхий сайд Л.Оюун-Эрдэнэ аж ахуйн нэгжүүдийн төлөөллийн үгийг сонссоны дараа “Төрийн 650 үйлчилгээ цахимжсан байна. Хамтдаа шийдлээ яриад хэрэгжүүлээд явбал жилийн дараа том өөрчлөлт гарна. Тиймээс хувийн хэвшлийнхэнтэйгээ хамтарч ажиллана. Төсвийн хэмнэлттэй холбоотой бодлогын шинэчлэл хийнэ. Та бүхэн МҮХАҮТ-аар дамжуулан саналаа өгөөрэй. Татвартай холбоотой олон асуудлыг сонслоо, судалж үзнэ. Энэ талаар аж ахуйн нэгжүүдтэйгээ дахин ярилцъя. Шинэ сэргэлтийн бодлогын хүрээнд ажлууд эрчимжиж, эдийн засгийг тэлэх төслүүдийн 70 орчим хувь нь шийдлээ олсон” гэлээ.

Төвлөрлийг сааруулах бодлогын хүрээнд нийслэлээс өөр газарт ажлын байр бий болгож, ажилтнууд нь шилжин суурьшсан бол төрөөс бодлогоор дэмжинэ, 500 км хол зайд үйл ажиллагаа явуулбал татварын хөнгөлөлт үзүүлэх заалтыг эргэж харна гэдгээ Ерөнхий сайд уулзалтын төгсгөлд хэллээ.

Засгийн газрын Хэвлэл мэдээлэл, олон нийттэй харилцах газар


0
angry
0
care
0
haha
0
liked
0
love
0
sad
0
wow

Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна

Шинэ мэдээ
Л.Гантөмөр: Энэ удаагийн сонгуулиас Монголын ирээдүй шууд хамаарна 3 цагийн өмнө
Л.Оюун-Эрдэнэ: Англи хэлийг албан ёсны хоёр дахь хэл болгох ажлыг Г.Дамдинням зориг гарган манлайлсан 3 цагийн өмнө
М.Бадарч: Цол, чимгээ нөхөж авч байгаа бөхчүүддээ баяр хүргэе, би допинг хэрэглээгүй учраас эцсийг нь хүртэл явна 3 цагийн өмнө
Өргөө кино театраас 3,4-р хорооллын эцэс хүртэлх замын хөдөлгөөнийг нээжээ 4 цагийн өмнө
Дарь-Эхчүүд МАН-аас нэр дэвшигчдийг багаар нь дэмжиж байна 4 цагийн өмнө
Л.Оюун-Эрдэнэ: О.Батнайрамдалыг сонгох та бүхний сонголт мянга, мянган залуусыг эх орондоо дуудах уухайн түрлэг байх юм шүү 5 цагийн өмнө
Түүнд туулах ёстой урт зам бий 5 цагийн өмнө
“Эрэл групп”-ийн зүүн талаар өнгөрөх авто замын хөдөлгөөнийг нээлээ 5 цагийн өмнө
Өвөрхангай аймгийн Сант сумын АН-ын дарга бусдын гарт амиа алджээ 5 цагийн өмнө
Баянголчууд ардчилсан намын нэр дэвшигчдийг багаар нь дэмжинэ 6 цагийн өмнө
ҮНДЭСНИЙ ЭВСЭЛ: Татварыг дээрэм биш, дэмжлэг болгоно 8 цагийн өмнө
“Шинэ хоршоо” хөдөлгөөний хүрээнд 3778 хоршоо байгуулагдаж, 38464 малчин хоршоонд нэгдлээ 19 цагийн өмнө
Н.Номтойбаяр: Авлигатай тэмцэнэ гэдэг Ардын намтай тэмцэнэ гэсэн үг 20 цагийн өмнө
Б.Тулга: Төвийн бүс нь Монгол Улсын хүнсний хэрэгцээг хангах стратегийн ач холбогдолтой 21 цагийн өмнө
Ц.Баатархүү: МАН тасралтгүй 8 жил засаглахдаа хотын түгжрэлийг бууруулах нэг ч шийдэл гаргаагүй 21 цагийн өмнө
Ц.Эрдэнэбат: Технологийн шийдлийг нэвтрүүлэхэд улс төрийн манлайлал, эр зориг хэрэгтэй 22 цагийн өмнө
Би яагаад нэр дэвших болов?  22 цагийн өмнө
Тэтгэвэр, тэтгэмжийн хагас хуримтлалын тогтолцоонд шилжүүлнэ Өчигдөр
Г.Дамдинням: Дархан, Сэлэнгэ, Төв аймаг үйлдвэрлэл, хөдөө аж ахуйн төв болно Өчигдөр
ҮНДЭСНИЙ ЭВСЭЛ: Ухаалаг хотын цогц, шинэ төлөвлөлтийг хэрэгжүүлнэ Өчигдөр