Өнөөдрөөс АИ-95 автобензин 350, АИ-98 автобензин 300 төгрөгөөр нэмэгджээ

АИ-95 бензиний үнэ литр тутамдаа 350 төгрөг, мөн АИ-98 бензиний үнэ литр тутамд 300 төгрөгөөр тус тус нэмэгдэв. Шатахуун түгээх станцуудад 3260 төгрөгөөр худалдаалж байсан АИ-95 бензин 3610 төгрөг болж, үнэ нь 10 хувиар өссөн байна. 

Дэлхийн зах зээлд газрын тосны бүтээгдэхүүний үнэ өссөөр байгаа бөгөөд Хойд хөрш ОХУ-д АИ-92 автобензиний ханш дунджаар 2460 төгрөгтэй тэнцэж байна. ОХУ-ын хувьд газрын тос олборлогч томоохон орнуудын нэг. Харин манай улс газрын тосны бүтээгдэхүүний импортоос 100 хувь хараат улс хэдий ч, 1 литр АИ-92 автобензинийг 2390 төгрөг буюу хойд хөршөөс хямд үнээр хэрэглэж байгаа юм. 

Тэгвэл үнэ нь өссөн АИ-95 бензиний хэрэглээ сард дунджаар 4000 тонн байдаг бөгөөд энэ нь шатахууны нийт хэрэглээний 6 хүрэхгүй хувь аж. АИ-92 автобензиний сарын хэрэглээ 40 мянган тонн байдаг бол АИ-95 бензин 10 дахин бага буюу 4000 тонн байдаг хэмээн импортлогч компаниуд мэдэгдлээ. Харин АИ-98 бензиний хувьд тансаг зэрэглэлийн автомашины түлш бөгөөд дотоодын шатахууны нийт хэрэглээний 0,5хүрэхгүй хувийг эзэлдэг байна. 

Харин өнөөдрийн байдлаар өргөн хэрэглээний АИ-92 автобензин болон Дизель түлшний үнэ нэмэгдээгүй байна. Засгийн газраас Гаалийн болон Онцгой албан татварын зохицуулалт хийж, “Роснефть” НХН-тэй хэлцэл явуулсны үр дүнд үнийн өсөлтөөс сэргийлж чаджээ. Өргөн хэрэглээний АИ-92 болон Дизель түлшний үнэд эдгээр зохицуулалтуудыг хийснээр дотоодод худалдаалагдах шатахууны үнэ литр тутамд 1200 орчим төгрөгөөр нэмэгдэж, улмаар өргөн хэрэглээний бараа бүтээгдэхүүний үнэд нөлөөлж, инфляцид савлагаа үүсгэх эрсдэлтэй байсныг салбарын эдийн засагчид дүгнэж байгаа юм.