Хөгжлийн банкны зээлийн эргэн төлөлтийн талаарх мэдээллийг Сангийн сайд Б.Жавхлан өглөө.
Тэрбээр "Төрийн өмчийн үйлдвэрийн газруудтай холбоотой чанаргүй зээлийг үлдсэн хугацаанд эргэн төлүүлж, барагдуулах чиг үүргийг холбогдох сайд нарт өгсөн. Энэ хугацаанд эрчимтэй үргэлжилж буй ажил ч байна. Удааширч байгаа ажлууд ч бий. Өнгөрсөн нэг сарын хугацаанд нийт 140 орчим тэрбум төгрөг бэлэн мөнгөөр төлөгдсөн нь бага дүн биш. 2022 оны нэгдүгээр сараас хойш чанаргүй зээл 800 тэрбум төгрөгөөр нэмэгдлээ. Ингэснээр Хөгжлийн банкны тэнцэл сайжирч, ирэх онд төлөгдөх хоёр ч бондын эрсдэл энэ хэмжээгээр багасч байна. Нийт 140 тэрбум төгрөг нөхөн төлүүлэхэд "Эрдэнэс Тавантолгой" компаниас 160 гаруй тэрбум төгрөгийн зээл төлөх учиртай үүнээс эхний ээлжид 117.3 тэрбум төгрөгийг төлж барагдууллаа. Үлдсэн 43 тэрбум төгрөгийг он гараад эхний улиралд багтаан төлөхөөр хугацааг тохиролцсон. Мөн "МИАТ" компани зээлийн үлдэгдэл болох 10 тэрбум төгрөгийн зээлийн үлдэгдлээ бүрэн төлж барагдуулснаар Хөгжлийн банкинд өргүй боллоо.
Мөн ТОСК, НОСК-иас нийлээд 1 тэрбум гаруй төгрөгийг төлж барагдуулсан. Мөн "Хөтөлийн цемент шохой" ТӨХК болон "Эрэл" компанийн чанаргүй зээлүүдийг төлүүлэх, "Шинэ-Яармаг" хорооллын зээлийг нөхөн төлүүлэх тал дээр хүч тавин ажиллаж байна. Бидний ажилд хүчний байгууллагууд буюу ялангуяа АТГ маш сайн хамтарч, дэмжин ажиллаж байна. Бид жилийн эцэст 1 их наяд төгрөг нөхөн төлүүлэх зорилго тавьж байна.
Энэ хугацаанд "Эрэл" компанийн зээлийг төлүүлэхээр албадлагын арга хэмжээ авч, өмч хөрөнгийг хураан авч, хүчний байгууллагатай хамтарна. "Хөтөлийн цемент шохой" үйлдвэрийн үйл ажиллагаа хэвийн үргэлжилж байна. Тус компани өөрийн дотоод үйл ажиллагааг санхүүжүүлэх ачаалалтай байна. Энэ дундуур Хөгжлийн банкны зээлийг төлөхөд үйл ажиллагаа нь доголдох эрсдэлтэй учраас Төрийн өмчийн бодлого зохицуулалтын газартай хамтран Хөгжлийн банкинд ажлын хэсэг гаргаж, хэд хэдэн хувилбар дээр ажиллаж байна.
Сэтгэгдэл (0)
Сэтгэгдэл бичигдээгүй байна