ОРОН ГЭРГҮЙ ХҮМҮҮСИЙГ ҮНЭГҮЙ ХООЛЛОХ МАШИН ГАРЧЭЭ

Их Британичууд дэлхийд анх удаа орон гэргүй хүмүүст үнэгүй хоол өгдөг автомат машиныг ашиглалтад оруулжээ. Ноттингем хотын олон нийтийн газар дэлгээтэй байх энэ машинаас орон гэргүй хүмүүс хоол хүнс, цэвэрхэн хувцас, шүдний сойз, бусад ариун цэврийн хэрэгслийг үнэгүй авч болно.

"Action Hunger" хэмээх буяны байгууллагаас энэхүү машиныг хотын супермаркетуудад түгээж, шинэхэн жимс, хачиртай талх, оймс, шүдний оо, сальфетка зэргийг нэмж байршуулахаар төлөвлөж байна. Энэхүү машиныг зөвхөн тэнэмэл, орон гэргүй иргэд ашиглах бөгөөд орон нутгийн захиргаанаас түлхүүрийг нь авах юм. Түлхүүрийг нь авсан нэг хүн өдөрт гурван барааг дуртай цагтаа авч болох ажээ.

Хүмүүнлэгийн байгууллагуудын тооцоолж буйгаар Их Британид 307 мянган тэнэмэл иргэн амьдардаг байна. Тиймээс цаашид эдгээр хүмүүст түр орогнох байр гаргаж өгөх нь зүйтэй гэж үздэг ажээ.