ПРИУС МАШИНЫ ЭД АНГИ ХУЛГАЙЛДАГ БҮЛЭГ ЭТГЭЭДИЙГ ИЛРҮҮЛЖЭЭ

Өвлийн улирал эхэлсэнтэй холбоотойгоор автомашины ил зогсоол дээрээс хучлага болоод эд анги хулгайд алдагдах хэрэг ихээр гарч байгааг цагдаагийн байгууллагаас анхааруулж байна. Тухайлбал, энэ сарын 14-ний БГД-ийн IV хороо 17-р байрны зогсоол дээр сэжиг бүхий хоёр этгээдийг саатуулж шалгахад тус дүүргийн 9 дүгээр хороонд суух Б /эр.17н/, Т /эр.17н/ нар зогсоолоос "Toyota Prius-20" маркын таван автомашинд халдаж, 16 ширхэг толийг хулгайлан авч явсныг үйлдэл дээр нь илрүүлсэн байна. Тус хэргийг БГД-ийн Цагдаагийн Хэлтэс-2 дээр шалгаж байна.

Түүнчлэн "СХД-ийн 19 дүгээр хороо 58-р байрны гадна 02:50-03:00 цагийн хооронд автомашины хучлага хулгайд алдлаа" гэсэн мэдээллийг авч шалгахад "Toyota Prius-20" автомашины хучлагыг СХД-ийн 22 дугаар хороонд суух Б /эр.45н/ гэгч хулгайлсныг шуурхай эрэн сурвалжилж илрүүлсэн байна. Энэ төрлийн хулгайн гэмт хэрэг их гарч байгаа тул иргэд сонор сэрэмжтэй байж, эд зүйлээ хулгайд алдахаас сэрэмжлэхийг Нийслэлийн цагдаагийн газраас анхааруулж байна.