БНСУ-д халдвар авснаа мэдээгүй өвчтөн таван клубээр орж, 2000 орчим хүнд халдвар тархсан байж болзошгүй

ЭМЯ-ны Гадаад харилцаа, хамтын ажиллагааны газрын дарга Б.Янжмаагийн мэдээллийг хүргэж байна. Тэрээр "БНСУ-д шинж тэмдэггүй буюу хөнгөн балархай шинж тэмдэг бүхий иргэн Сөүлийн шөнийн клубүүдэд орохдоо доод тал нь 14 хүнд халдвар тараасныг тогтоожээ. Цаашид 2000 гаруй хүнийг халдварлуулсан байж болзошгүй гэж үзэж байна" гэлээ.

БНСУ-д коронавирусээр халдварласнаа мэдээгүй өвчтөн Сөүл хотын Итаевон дүүргийн таван клубээр үйлчлүүлсэн байна гэж тус улсын холбогдох албаны төлөөлөгчид мэдээллээ.

29 настай эрэгтэй халдвар авснаа мэдээгүй байхдаа өнгөрсөн баасан гарагт таван клубээр орсон бөгөөд бямба гаргаас өндөр халуурч, гүйлгэж эхэлжээ. Ингэснээр БНСУ-д олон нийтийн дунд халдвар тархсан байж болзошгүй нөхцөл байдал үүсжээ.

Сөүл хотын засаг захиргаа, Өвчинд хяналт тавих, урьдчилан сэргийлэх төвийн мэргэжилтнүүд  өвчтөний ойрын хавьтал болох 2000 орчим хүнийг илрүүлэхээр ажиллаж байгаа ажээ.

Одоогийн байдлаар өвчтөний ойрын хавьтлын таван хүний шинжилгээний хариу сөрөг гарсан бөгөөд шинж тэмдэг илрээгүй нэг найзаас нь халдвар илэрчээ. Түүнчлэн уг өвчтөн гадаадын оронд зорчоогүй, халдвар авсан өвчтөнтэй ойр байгаагүй тул олон нийтийн дунд байхдаа халдвар авсан хэмээн үзэж байгаа ажээ.