Тогтоол усанд тоглохоор очсон дөрвөн хүүхэд харамсалтайгаар амиа алдсан. Тэдэнтэй хамт 11-15 насны зургаан хүүхэд явсан бөгөөд тэдний нэг 13 настай Т-тэй бид уулзсан юм. Т хүү айлын том хүү бөгөөд 11, 4 настай хоёр дүүтэй. Осол болсон өдөр аав нь амарсан учир бага дүүгээ үлдээгээд 11-тэй дүүтэйгээ хамт тоглохоор Үндэсний цэцэрлэгт хүрээлэн рүү явжээ. Тэрбээр ярихдаа “Би дүү Б-ээ дагуулаад, найзуудтайгаа Цэцэрлэгт хүрээлэн явсан. Тэр тогтоол усанд жараахай байдаг юм байна лээ. Бид нар эхлээд жараахай барьж, ундааны саванд хийж тоглосон. Дараа нь тэнд байсан хөөсөнцөрүүдээс тэврээд усанд сэлсэн. Дүү бид хоёр бас Э ус руу ороогүй. Тэр ус хэр гүн байсныг мэдэхгүй. Манай найз О усны гол хэсэгт очоод хөөсөнцөрөө алдаад өөрөө доошоо орсон. Ах нь дүүгээ авах гэж ороод бас гарч ирж чадаагүй. Бид нар хүмүүсээс тусламж гуйхаар гүйгээд ах, эгч хоёрыг олж чадсан. Тэр эгч нэг хүүхдийг уснаас аварсан. Тэгээд л эмнэлэг цагдаа дуудсан. Хамгийн түрүүнд эмч ирсэн. Онцгойгийн ах нар завьтай хайгаад гурван найзыг маань гаргаж ирсэн. Нэг найз маань олдохгүй хоёр цаг орчим болж, олдсон. Бид нар их айсан, уйлаад л усны эрэг дээр сууцгаасан. Тэгээд Баянзүрх дүүргийн цагдаагийн газарт очиж, мэдүүлэг өгсөн. Гараад иртэл бүх аав ээж нар ирчихсэн, уйлалдаад л их хэцүү байсан.
Нас барсан найзуудтайгаа би багаасаа хамт тоглож найзалсан. Мөнгөтэй үедээ хамтдаа амттан авч иддэг байсан. Одоо тэд нартай хамт тоглохгүй гэхээр “аймаар” байна. Гэрээсээ хол явсандаа харамсаж байна. Аав ээж маань дүү бид хоёрыг загнаагүй ч маш их айж байна. Тэр ус тийм гүнзгий байсан бол “хүүхэд орвол аюултай” гээд биччихсэн бол найзууд маань орохгүй байсан байх. Одоо би дүү нараа хараад гэртээ л байна”
Сэтгэгдэл (0)
Сэтгэгдэл бичигдээгүй байна