Испанийн талаас Дархан арьс ширний цогцолборт хөрөнгө оруулалт татах ажил урагштай байна

2019 оноос манай аймаг нь Испанийн Вант улсын Астуриас мужтай ах дүүгийн хамтын ажиллагаатай хотууд болсон билээ.

Хамтын ажиллагааны хүрээнд Дархан арьс ширний цогцолборт Испанийн хөрөнгө оруулагчдыг татах, шаардлагатай хөрөнгө оруулалтын асуудлыг шийдвэрлэх асуудлаар Испанийн бизнес эрхлэгчдэд танилцуулж хөрөнгө оруулалт татах ажил эрчимтэй явагдаж байна.

Дархан арьс ширний цогцолбор нь Дарханы Төмөрлөгийн үйлдвэрээс зүүн урагшаа, нийт 180 га талбайд баригдаж байгаа билээ. Тус цогцолборыг барьж байгуулахад нийт 225 сая ам.долларын өртөг шаардлагатай байгаа юм. Өнөөдрийн байдлаар тус цогцолборт цахилгаан түгээх, дамжуулах дэд станцын барилга, дулааны шугам хоолой татах, ноос угаах, самнах үйлдвэрийн барилгын ажлууд хийгдэж байна.

Цогцолборын үйл ажиллагааны 15 хувь нь орон нутгийн мэдэлд, үлдэх хувийг хувийн хэвшлийнхэн бүрдүүлнэ. Төсөл хэрэгжиж эхэлснээр арьс шир, ноос ноолуурын борлуулалтын эргэлтийг түшиглэсэн олон үйлдвэрүүд байгуулагдаж, дотоодын тээвэр, химийн үйлдвэрлэл гээд маш олон салбар дагаж хөгжих юм.

Үүнээс гадна Испанийн Вант улсын Астуриас мужтай эрчимжсэн мал аж ахуй, худалдаа, аялал жуулчлалын салбарт хамтын ажиллагааг хөгжүүлэх зорилготой хамтран ажиллаж байна.