БНСУ-д томуугийн вакцин хийлгээд нас барсан иргэний тоо 15-д хүрчээ

БНСУ-д томуугийн вакцин хийлгээд нас барсан иргэдийн тоо өнөөдөр өглөөний 11 цагийн байдлаар 15-д хүрсэн байна. Хамгийн эхний тохиолдол энэ сарын 16-ны өдөр бүртгэгдсэн бөгөөд 17 настай сурагч вакцин хийлгээд хоёр хоногийн дараа нас барсан аж. Ингээд 20-ны өдөр гурван иргэн, 21-ны өдөр найман иргэн, 22-ны өдөр хоёр иргэн нас барж нийт 15-н иргэний нас барсан шалтгааныг Солонгос улсын эрүүл мэндийн газраас шалгаж байгаа юм. Эдгээр иргэд бүгд өөр өөр төрлийн вакцин хийлгэсэн бөгөөд Солонгос улсын өвчинд хяналт тавих, урьдчилан сэргийлэх төвөөс мэдэгдэж буйгаар иргэдийн үхлийн шалтгаан томуугийн вакцинтай холбогдолтой эсэх нь одоогоор тодорхой бус байгаа гэжээ. Нас барсан иргэдийн насны хувьд 17-оос 90 насны иргэд байгаа бөгөөд зарим иргэд ужиг хууч өвчтэй байсан бол ямар ч өвчний шинж тэмдэггүй гэнэт нас барсан иргэд ч байгаа аж.

Эх сурвалж: YONHAP NEWS