Нэгэн залуухан, чухал албан тушаал хашдаг, төрийн хувцастай хурандаа бусдыг дарамталж, авилга авч байгаад баригджээ.
Хэрэг явдал хэрхэн өрнөсөн талаар манай сайтын сурвалжлах баг мэдээллийн эрэлд гарлаа. Бидний олж авсан мэдээллээр Цагдаагийн ерөнхий газрын Хар тамхитай тэмцэх газрын Мөрдөн шалгах хэлтсийн дарга, Цагдаагийн хурандаа Ж.Батмөнх нь БНХАУ-ын иргэнийг дарамталж авилга авч байгаад АТГ-ын мөрдөгч нарт баригдсан аж. Цагдаагийн хурандаагийн ил үйлдлийг хууль хяналтын байгууллагынхан маш өндөр түвшинд нууцалж байгаа нь биднийг мэдээллийн араас явах үед анзаарагдсан юм.
Баттай эх сурвалжийн мэдээллээр хурандаа Ж.Батмөнх нь төрсөн дүүгийнхээ дансаар 2020 оны есдүгээр сарын тавны өдөр 18 сая төгрөг, есдүгээр сарын зургаанд 16 сая нийтдээ хоёр өдрийн дотор 35 сая төгрөг авчээ.
Энэ үйл явдлаас хойш сар гаруйн хугацааны дараа буюу 10-р сарын 16-нд гар утас авч өг хэмээн ахин дарамталж, 35 сая төгрөгөө өгсөн Хятад улсын иргэн Тэди төвөөс цайвар ногоон өнгөтэй “iphone-11” загврын гар утсыг хоёр сая 100 000 төгрөгөөр худалдан авч өгчээ. Цагдаагийн хурандаа нь гар утсаа ЧД-ийн нутаг дэвсгэр болох “Хүнсний дүгээр дэлгүүр”-ийн ойролцоо байдар Хаан банкны үүд орчмоос авсан байна.
Энэ үед нь түүнийг АТГ-ын байцаагч нар саатуулсан аж. Тэрбээр гадны иргэнийг удаа дараа дарамталж мөнгө авсан байх магадлалтай юм. Цагдаагийн хурандаа Ж.Батмөнх нь өмнө ЦЕГ-ын Мөрдөн байцаах газрын Залилан гэмт хэрэг мөрдөх хэлтсийн даргаар ажиллаж байгаад 2019 оноос Хар тамхитай тэмцэх газрын Мөрдөн шалгах хэлтсийн даргаар ажиллаж эхэлжээ.
Улмаар БНХАУ-ын иргэдийг дарамталж мөнгө нэхэхдээ “Та нарыг цагдаагийн байгууллагаас шалгах гээд байна, би аргалж өгнө” гэж мөнгө авдаг тухай мэдээлэл бий. Түүнийг ШШГЕГ-ын харьяа хорих 461-р ангид 48 цагийн хугацаатай саатуулаад суллажээ. Тус хэргийг АТГ-аас шалгаж, Нийслэлийн прокурор хяналт тавьж байна.
Сэтгэгдэл (0)
Сэтгэгдэл бичигдээгүй байна