Эдийн засаг, нийгмээ хөгжүүлэх үндсэн чиглэл гээч юмыг жил бүр батладаг ч, гардаг үр дүн нь хангалттай биш гэдгийг хаа хаанаа хүлээн зөвшөөрөхгүй гээд яах билээ. Монгол Улсын эдийн засаг, нийгмийг 2016 онд хөгжүүлэх үндсэн чиглэлийн биелэлт 62,1 хувьтай гарчээ. Тэгвэл Үндэсний аудитын газраас эдийн засаг, нийгмийг хөгжүүлэх үндсэн чиглэлийн биелэлтийн талаарх дүгнэлтийг гаргахдаа жил бүр л аргацаасан, мөлгөр дүгнэлтийг гаргадаг хэмээн үзэж буйгаа Л.Энх-Амгалан гишүүн хэллээ. Тэрбээр "Миний хувьд УИХ-ын гишүүн таван жил ажиллахдаа таван удаагийн эдийн засаг, нийгмийг хөгжүүлэх үндсэн чиглэлийн биелэлттэй танилцаж байна. Жил бүр л аргацаасан, мөлгөр дүгнэлтийг Үндэсний Аудитын газрынхан гаргах юм" гэсэн юм. Мөн тэрбээр аудитын байгууллагын дүгнэлттэй санал нийлэхгүй олон зүйл байгааг хэлсэн. Аудитын байгууллагаас гарсан дүгнэлтэд 2016 онд эрүүл мэндийн салбарын зорилт 91,8 хувь биелсэн гэсэн байгааюм. Тэгвэл Л.Энх-Амгалан гишүүн "2016 онд улаанбурхан өвчнөөр олон арван хүүхэд нас барж, эцэг эхчүүдэд нөхөж баршгүй хүнд гарч тохиосон. Монгол Улсад анх удаа улаанбурхан өвчин ийм аюултай харанга дэлдэж байсан тохиолдол энэ юм.Сүүлийн 10 жилтэй харьцуулахад эх, нялхсын эндэгдэл өндөр түвшинд байлаа. Өнгөрсөн онд 79194 эх төрж, 39 эх нас барчээ. Ийм байхад яагаад 91,8 хувь гэж? хэмээн асууж байна.
Эх сурвалж: Зариг.мн
Сэтгэгдэл (0)
Сэтгэгдэл бичигдээгүй байна