Өнөөдөр Транспэрэнси интернэшнлээс 2020 оны авилгын индексийг танилцууллаа.Тодруулбал манай улс 100 онооноос 34 оноо авч, дэлхийн улс орнуудаас 111 дүгээр байрт жагсаж байгаа юм. Өөрөөр хэлбэл авилга, ашиг сонирхлын зөрчил хамгийн их байдаг улс орнуудын тоонд зүй ёсоор багтсан хэвээр байна.
Транспэрэнси интернэшнл Монгол” гүйцэтгэх захирал О.Батбаяр: Авилгын индексийн оноо бага улс орнуудад байгаа нийтлэг нэг үзэгдэл байна. Тодруулбал тухайн улс орнуудад хавдар, зүрх судасны өвчлөлийн нас баралт, амьсгалын замын өвчлөлийн нас баралт өндөр гарсан байна. Яагаад ийм хамааралтайг тайлбарлавал, эрүүл мэндийн салбарт авилгын асуудал хамгийн тулгарсан асуудал гэдгийг харуулж байгаа юм. Зүрх судас, хавдар, амьсгалын замын өвчлөлүүдтэй тэмцэхэд энэ улс орнууд эрүүл мэндийн салбартаа хөрөнгө оруулалт хангалттай хийж чаддаггүй. Худалдан авалт нь үр дүнтэй байж чаддаггүй, хэрэгтэй шаардлагатай тоног төхөөрөмж худалдан авах механизм нь шудрага бус явагддагаас болоод тухайн улс орнуудад ийм төрлийн нас баралт нийтлэг ажиглагдаж байгааг Берлинээс гаргасан авилгын индекст онцолсон байна. Манай улс авилгын индексийн оноо бага улс. Нөгөө талаасаа хавдар, зүрх судасны өвчлөлөөр дэлхийд тэргүүлдэг. Авилга өөрөө ЭМ-ийн салбарт ноцтойгоор тавигдаж байна. Энэ нь эргээд иргэдийн амь насанд заналхийлж үхэлд хүргэж байгааг харуулж байна. Коронавирус нь эрүүл мэндийн салбарын авилгын асуудлыг нийгэмд тодоор харуулах, илчлэх ийм боломжийг олголоо гэдгийг Транспэрэнси интернэшнл байгууллагын Берлин дэхь төвөөс онцолж мэдээлсэн байна. Учир нь улс орнууд коронавирустэй тэмцэж байхдаа ЭМ-ийн салбартаа ашигтай хөрөнгө оруулалт хийж чаддаггүй байдал нь коронавирустэй тэмцэх тэмцлийг үр дүнгүй болгож байгааг онцолсон байна.