Хавдар судлалын үндэсний төв (ХСҮТ)-ийн эмч нар Хөвсгөл аймгийн иргэн Т.Батбаяраас гурван сая төгрөгийн авилга нэхсэн тухай нэвтрүүлгийг LIVETV HD телевиз бэлтгэн хүргэсний дараа АТГ-аас нэр бүхий эмч нарыг шалгаж эхэлжээ.
Хавдраа авхуулах хагалгаанд орох гэж байсан тухайн иргэний ар гэрийнхнээс ХСҮТ-ийн мэс заслын эмч Э.Эрхэмбаяр “20 минутын дотор гурван сая төгрөг авчирч өг. Өгөхгүй бол эмнэлгээс яв” гээд уг мөнгийг нь өгөөгүй тул төлөвлөгөөт хагалгааг цуцалж, Т.Батбаярыг эмнэлгээс гаргасан юм.
ХСҮТ-өөр үйлчлүүлсэн иргэн Т.Батбаяр энэ тухай гомдлыг ЭМЯ-нд гаргаж, хэвлэлд хандсанаар олны анхааралд өртөөд буй билээ.
Мэс засалд ороход шаардлагатай зардлын 25 хувийг Эрүүл мэндийн даатгалын сангаас төлж, үлдсэнийг нь эмчлүүлэгчээс гаргуулах журам үйлчилж буй ч дээрх өвчтөний тухайд гурван сая төгрөг бус харин 998,139 төгрөг болох байсан аудитын шалгалтаар тогтоогдсон байдаг тул ХСҮТ-ийн эмч нар илүү мөнгө авахыг завдсан байж болзошгүй гэж үзэж байгаа аж.
Тиймээс энэ асуудлыг АТГ-ын Мөрдөн шалгах хэлтэст шалгаж эхэлсэн гэдгийг хэд хэдэн эх сурвалж баталлаа. Тэд “ХСҮТ-ийн нэр бүхий эмч нарт хэрэг бүртгэлтийн хэрэг нээн шалгаж эхэлсэн. Мөн тэднээс гадна эмнэлгийн үйл ажиллагаатай холбоотой асуудлыг шалгахаар болжээ. Шалгалтын явцад нэр бүхий эмч нарт эрүүгийн хэрэг үүсгэн цаашид яллагдагчаар татан шалгах, эсэхийг шийдвэрлэнэ” гэх мэдээлэл өгсөн юм.
Сэтгэгдэл (0)
Сэтгэгдэл бичигдээгүй байна