Улаанбаатар дулааны сүлжээ ТӨХК: Худгаас их хэмжээний уур гарч байна гэсэн дуудлага ирж, очиход дулааны худаг усаар дүүрсэн байсан

Дулааны шугамын худагт осол гарч, гурван иргэн нас барсан хэргийн талаар Улаанбаатар дулааны сүлжээ ТӨХК мэдэгдэл гаргажээ.
Мэдэгдэлд 2020 оны 02 дугаар сарын 08-наас 09-нд шилжих шөнө БГД-ийн V хорооны нутаг дэвсгэр 27-р байрны хажууд, ”Тэлмүүн орд” хувийн орон сууцны конторын эзэмшлийн дулааны худгаас их хэмжээний уур гарч байгаа тухай мэдээлэл “Улаанбаатар дулааны сүлжээ” ТӨХК-ийн Шуурхай албанд 22 цаг 09 минутад ирсэн. 
Ирсэн дуудлагын дагуу манай байгууллагын шуурхай ажиллагааны бүрэлдэхүүн газар дээр нь очиход дулааны худаг нь усаар дүүрсэн байсан тул ус буулгагчийг хаахад хүндрэлтэй байсан ч тухайн хаалтыг хааж хэвийн байдалд нь оруулсан.
Үүнээс шалтгаалан гурван иргэн халуун усанд түлэгдэж харамсалтайгаар амь насаа алдсан.
Иймд дулааны эрчим хүч хэрэглэгч хувь хүн, аж ахуйн нэгж, тусгай зөвшөөрөл эзэмшигчид байгууллагууд өөрийн эзэмшлийн дулааны худаг камерт гадны болон орон гэргүй иргэд зөвшөөрөлгүй орж шугам тоноглол гэмтээх, амь насаа алдахаас урьдчилан сэргийлж, тогтмол үзлэг шалгалт хийж ажиллахыг анхааруулж байна гэжээ.