Румын улсын Батлан хамгаалахын сайд Николае Чуке нь олон нийтийн сүлжээнд маш нууц мэдээллийг ил болгосон тухай “Digi 24” суваг мэдээлсэн байна. Сайд дарга нар олон нийтийн сүлжээгээр хийсэн ажлаа тайлагнаж, лайк даруулах гэдэг. Румыны сайд Сибиухотод байдаг хуурай замын цэргийн академид хийсэн айлчлалынх талаарх зургуудаа “Facebook” сүлжээнд байршуулжээ. Гэтэл нэг зураг дээр нь яамны өндөр тушаалт офицерууд видео хурал хийхэд ашигладаг аккаунт нэр, тэдгээрийн нууц үг, Батлан хамгаалах яамны шуурхай төвийн ажилтнуудын нууц утас зэргийг бичсэн самбар байсныг анзаараагүй юм байна. Харин “Facebook”-ийн хэрэглэгчид сайдаас илүү хянамгай байж таараад нууц мэдээ алдагдсан тухай мэдээлж, тэр талаар нь Румыны хэвлэл мэдээллийн хэрэгслээр шуугьж эхэлсний дараа зургийг устгажээ.
Өнгөрсөн жилийн арваннэгдүгээр сард үүнтэй төстэй хэрэг мандаж байсан. Нидерландын сэтгүүлч ДаниэльВерлаан гэгч нь Европын холбооны гишүүн орнуудын Батлан хамгаалахын сайд нарын нууц видео хуралдаанд нэвтэрч, зарим сайдаас нь ярилцлага авсан хэрэг маш их дуулиан тарьсан. Европын холбоон хүчний байгууллагуудын дарга нарын нууц хурал байтал яаж мэдээд, яаж нэвтэрсэн талаар мөрдлөг явуулсан. Ингэхэд Нидерландын Батлан хамгаалахын сайд Анка Бейвельд нь нууц хурал явагдах хаяг, нэвтрэх нэр, нууц үг бүхий тэмдэглэгээтэй фото зургаа “Twitter” дээр байршуулсан байсныг сэтгүүл эр анхааралтай ажиглаж байгаад олж мэдээд, овжин ашигласан байж таарсан.
Сэтгэгдэл (0)
Сэтгэгдэл бичигдээгүй байна