Ж.Байгалмаа: Улаанбаатар хотын хувьд хамгийн гол хариу арга хэмжээ бол хөл хорио тогтоох

ХӨСҮТ-ийн Тандалт, судалгааны албаны дарга Ж.Байгалмаа: "Тохиолдлын тоо өдөрт 200-400 болох  тооцоолол хийгээд орон нутгаас эрүүл мэндийн ажилтнууд авчирч, хүн хүчний нөөцөө нэмэгдүүлсэн. Гэтэл 600- 700 халдвар гарч байна. Мөн л үүнтэй уялдуулж өнгөрсөн долоо хоногт  шуурхай хариу арга хэмжээний багийн тоог нэмэгдүүлсэн. Нийслэлийн хэмжээнд 48 баг шуурхай хариу арга хэмжээний үйл ажиллагаанд оролцоод явж байгаа. Гэвч халдварын тоо өдөр бүр нэмэгдсээр байгаа учраас шуурхай хариу арга хэмжээний баг халдвартай иргэдэд хүрч очиж ажиллах хугацаа уртассаар байх нөхцөл бүрдээд байна. Улаанбаатар хотын хувьд хүн амын дунд халдвар өргөн тархсан гэж үзэж байгаа бөгөөд энэ үед авах хамгийн гол хариу арга хэмжээ бол хөл хорио тогтоох юм.Мэргэжлийн байгууллагын хувьд хөл хорио тогтоох, бүх нийтийн бэлэн байдлын зэрэгт шилжих шаардлагатай гэсэн саналаа үргэлж өгөөд явж байна.