Булган аймгийн Засаг дарга Б.Ариун-Эрдэнэ нь тус аймгийн нөөцийн газрын даргаар Г.Батдэлгэрийг томилжээ. Г.Батдэлгэр нь Булган аймгийн Засаг дарга Б.Ариун-Эрдэнэтэй дотны найзууд гэх мэдээлэл бий. Тэгвэл тус аймгийн Нөөцийн даргаар ажилладаг Г.Батдэлгэр нь хүний наймааны хэрэг болон бусдыг биеэ үнэлэхэд зуучилсан хэргээр ял сонсож байжээ.
Тодруулбал, Г.Батдэлгэр нь давтан үйлдлээр хүнийг хил давуулан худалдаалсан, мөн бусдыг биеэ үнэлэхэд зуучилсан хэргээр шүүхээс түүний 150 мянган төгрөгийг хурааж, таван жил зургаан сарын хорих ялыг сонсож байсан нэгэн. Г.Батдэлгэр нь бусадтай үгсэн хуйвалдаж Сингапур, Малайз, Макао зэрэг улсууд руу охид эмэгтэйчүүдийг "өндөр цалинтай ажилд зуучилна" гэж хуурч мэхлэн, хил давуулан биеийг нь үнэлүүлэхээр бусдад худалдаалж байсан нь шүүхээр тогтоогдож байжээ.
Бид хүний наймаа, биеэ үнэлэлт зохион байгуулсан нь шүүхээр тогтоогдож 5,6 жилийн ял сонсож байсан иргэнийг ямар шалтгаанаар нөөцийн газрын даргаар томилсон асуудлаар Булган аймгийн засаг дарга Б.Ариун-Эрдэнээс утсаар тодруулах гэсэн боловч "Хуралтай байна" хэмээн утсаа салгав.
Шүүхээс ноцтой хэргээр ял сонсож байсан иргэн төрийн албанд найзын холбоогоор даргын албан тушаалд томилогдсон гэх асуудал нь анхаарал татаж байгаа юм.
Сэтгэгдэл (0)
Сэтгэгдэл бичигдээгүй байна