ЭМЯ: Иргэдээс вакцины гурав дахь тунгийн бичиг нэхэж, ялгаварлан гадуурхаж болохгүй

Эрүүл мэндийн сайдын А/564 дугаар тушаалаар "Ковид-19"-ийн эсрэг вакцины гурав дахь тун буюу дархлаа сэргээх нэмэлт тунд 18 ба түүнээс дээш насны иргэдийг сайн дурын үндсэн дээр хамруулж буй. Иргэн та коронавирусийн нэг, хоёрдугаар тундаа хамрагдаад гурав ба түүнээс дээш сар болсон бол вакцины гурав дахь тундаа хамрагдах боломжтой.

Коронавирусээр өвчилсөн бол гурав дахь тунг заавал хийлгэх шаардлагатай юу?

Хэрвээ та вакцины нэгдүгээр тунд хамрагдаад коронавирусийн халдвар авч өвчилсөн бол эдгэснээс хойш 21 хоногийн дараа хоёр дахь тунд хамрагдах боломжтой. Харин хоёр тунд бүрэн хамрагдаад халдвар авсан тохиолдолд гурав дахь тунг одоогоор зөвлөхгүй байгааг анхаарна уу. 

Дархлаа сэргээх нэмэлт тунд 18 ба түүнээс дээш насны иргэдийг сайн дурын үндсэн дээр хийлгэх атал төрийн байгууллагуудаар үйлчлүүлэхийн тулд заавал вакцины гурав дахь тун хийлгэсэн байх шаардлагатайг хэлж буй. Тиймээс энэ талаар ЭМЯ-ны Төрийн нарийн бичгийн дарга Ц.Эрдэмбилэгээс тодрууллаа.