ЗТХ-ийн сайд Л.Халтар Цогтцэций-Чойр чиглэлийн нүүрс тээвэрлэлтийг зогсоох болсныг монгол жолооч нар эсэргүүцэв

 Цогтцэций-Чойр чиглэлийн улсын чанартай авто замаар нүүрс тээвэрлэлт явуулахгүй гэсэн Зам тээврийн сайд Л.Халтар сайдын шийдвэрийг Монгол тээвэрчид, тээвэрчдийн эрхийг хамгаалах төрийн бус байгууллагууд эсэргүүцэж байна. Тус чиглэлийн авто энэ сарын 20-ноос эхлэн зогсоох юм байна. Түүнчлэн өнөөдөр /2021.10.11/ өглөөний 09 цагаас эхэлж, Тавантолгойн орд газраас Ханги-Мандал чиглэлийн шороон зам, Хулд, Мааньт чиглэлийн хатуу хучилттай замын нүүрс тээвэрлэлтийг  зогсоожээ.

Цогтцэций-Чойр чиглэлийн шороон замаар Монгол компани, Монгол тээвэрчид нүүрсний экспортын тээвэрлэлт хийхийн тулд өөрсдөө мөнгө гаргаж замаа засаж тээвэрлэлтээ хийж байсан ч ЗТХ-ийн сайд Л.Халтар сайд замыг нь хаасанд  Монгол тээвэрчид бухимдаж түүнийг огцрохыг шаардлаа. 

Тэд аравдугаар сарын 20-ны өдрөөс Цогтцэций-Чойр чиглэлийн замыг хаах шийдвэрээ өнөөдрийн дотор цуцал, хэрэв цуцлахгүй бол эксортын бүх чиглэлийн нүүрс тээвэрлэлтийг шийдвэр гаргах хүртэл  зогсоож, тэмцлийн дараагийн хэлбэрт шилжихээ мэдэгдээд байна.

Жолооч нарын зүгээс "Л.Халтар сайд адилхан шороон замаар нүүрс тээвэрлэж байгаа Ханги, Хулд чиглэлийн Хятад компаниудын нүүрсний тээвэрлэлтийг зогсоогоогүй мөртлөө Чойр чиглэлийн шороон замыг яагаад ад үзэх болов. Ханги чиглэлийн шороон замын тээвэр Монголын төмөр замын барьсан, төрийн, төсвийн хөрөнгөөр барьсан замаар хятад компанийн тээвэр хэвийн явсаар байна. Хулд чиглэлийн нүүрс тээвэр Цогтцэцийгээс Хулд сум хүртэл зорчигч тээврийн хатуу хучилтта замаар яваад Хулд сумаас шороон замаар Чойр хүрдэг бас л төрийн, төсвийн мөнгөөр барьсан замаар ч хятад компанийн хятад жолоочтой, хятад компани тээвэр хийж байна. Харин Цогтцэций-Чойр чиглэлийн замаар зөвхөн Монгол тээвэрчид, Монгол тээврийн компани өөрсдийн хөрөнгөөр зассан замаар нүүрс тээвэрлэдэг. Энгийн хүн ч ойлгох энэ ялгааг Л. Халтар сайд яагаад ойлгохгүй монголчуудаа, монгол тээвэрчид, монгол тээврийн компаниудаа хясан боогдуулах болов.  Шалтгаан нь тэр Хятадын дүрмээр тоглож эхэлсэн үү, хариултыг өөрөөс нь олно" хэмээн шаардлага тавиад байгаа юм.