Ардчилсан намын Онц Их хурал үргэлжилж байна. Энэ удаагийн Их хурал 330 сум, 21 аймаг, есөн дүүргийн төлөөлөгчид ирж 95 хувийн ирцтэйгээр хуралдаж байна. Хурлын төлөөлөгчид хуралдааны тэргүүлэгч, даргалагч нарт хандан хурал үр дүнтэй болох ёстой гэдэг шаардлагыг тавив. Тиймээс намын дүрмийн дагуу цаасан сонгуулиар олонхийн санал авсан О.Цогтгэрэлийг намын даргаар хурлын төлөөлөгчид батламжлах ёстой гэсэн саналыг аймаг, дүүргээ төлөөлөн үг хэлж байгаа хүмүүс илэрхийлж байна. Тухайлбал, Баян-Өлгий аймгаас ирсэн төлөөлөгч
“Олон жил хүсэн хүлээсэн цаг ирсэнд баяртай байна. Орон нутгийн гишүүд итгэлээ алдаад байсан. Итгэлийг сэргээсэн сайхан үйл ажиллагаа боллоо. Ерөнхийлөгч, Ерөнхий сайдаар ажиллаж байсан хүмүүс маань эвлэлдэн нэгдэхгүй бол ялалт, амжилт гэж байхгүйг тодорхой хэллээ. Орон нутагт нам хагараагүй Баян-Өлгийд гэхэд ганцхан Ардчилсан нам байгаа. Хагарал хаана байна гэвэл удирдлагуудад л байна”. Баянхонгор аймгийн төлөөлөгч Д.Амаржаргал “Монгол орны өнцөг булан бүрээс цуглан ирсэн журмын нөхөддөө монгол бахархлын өдрийн мэнд хүргэе. Баянхонгорт нам нэг байгаа. Толгойд байгаа хэдхэн ах нар намыг хувааж байна. Энэ танхимд цугласан гишүүд намын цөм байна. Эндээс асуудлаа шийдээд гарцгаая. Бидний ард намаа нэгтгээд ирээрэй гэж явуулсан мянга мянган гишүүн хүлээж байгаа. Буцаж очоод хэлэх үггүй байх вий, хурал үр дүнгүй болох вий гэж би санаа зовж байна. Тиймээс О.Цогтгэрэлийг батламжлах хэрэгтэй байна” гэх зэргээр санал хэлж байна.
Сэтгэгдэл (0)
Сэтгэгдэл бичигдээгүй байна